Հաշմանդամություն ունեցող տղաները պետք է լրջորեն սպորտով զբաղվեն եւ մասնակցեն մրցույթների. Սարգիս Ստեփանյան

Հաշմանդամություն ունեցող տղաները պետք է սպորտով զբաղվեն ոչ միայն առողջական վիճակը բարելավելու, այլեւ միջազգային մրցույթների մասնակցելու եւ հաղթելու համար: NEWS.am Medicine-ի թղթակցի հետ զրույցում նման կարծիք հայտնեց սպա Սարգիս Ստեփանյանը:

Սպա Ստեփանյանի անունը լավ հայտնի է զինվորական ծառայության ժամանակ վիրավորված բազմաթիվ տղաների: 2014 թվականի ամռանը Ստեփանյանը վիրավորվելու հետեւանքով կորցրել է ձեռքն ու երկու ոտքերը. հիմա նա ոչ միայն շարունակում է ծառայել ՊՆ-ի զորամասերից մեկում, այլեւ բազկամարտով է զբաղվում եւ մասնակցում է միջազգային մրցույթների: Նա նաեւ ժամանակ է գտնում վիրավոր զինծառայողներին այցելելու, նրանց սատարելու եւ իր օրինակով ապացուցելու, որ կարող են շատ բանի հասնել, եթե նույնիսկ վիրավորվելու հետեւանքով առողջությունը լրջորեն տուժել է:

«Հանուն առողջության սպորտով զբաղվելը, իհարկե, լավ է ու կարեւոր: Բայց ցանկալի է, որ մեր տղաները նաեւ նպատակ ունենան մասնակցել միջազգային մրցույթների եւ հաղթել: Շատ կցանկանայի, որպեսզի սպորտով զբաղվեն ոչ թե սիրողական մակարդակով, այլ հաջողության եւ հաղթանակի հասնելու նպատակով: Դրա համար հարկավոր է նրանց հաղթողի հոգեբանություն ներարկել»,- նշեց Սարգիս Ստեփանյանը:

Վերջին տարիներին Սարգիսը բազմիցս է Հայաստանը ներկայացրել հաշմանդամություն ունեցող մարդկանց համար կազմակերպված միջազգային մրցույթներին: Նրան, սակայն, շփոթեցնում է փաստը, որ այս տարիներին ինքը Հայաստանից միակ ներկայացուցիչն է եղել, մինչդեռ Ուկրաինայից, Ռուսաստանից, Վրաստանից, Թուրքիայից եւ այլ երկրներից 30-50 մարզիկ է ժամանում:

«Կցանկանայի, որպեսզի Հայաստանից նույնպես ավելի շատ մասնակիցներ լինեն: Դա պատիվ կբերի մեր երկրին»,- նշեց սպա Ստեփանյանը:

Նրա խոսքով, երբ պատրաստ լինի վիրավոր եւ հաշմանդամ զինծառայողների համար վերականգնողական կենտրոնը, տղաներն ավելի մեծ հնարավորություններ կունենան եւ ավելի շատ մասնագիտացված սարքավորումներ՝ մարզումների համար: Բայց սպորտում լավ արդյունքների հասնելու եւ հաղթանակի համար հարկավոր է ոչ միայն լավ մարզասրահ եւ սարքավորումներ ունենալ, այլեւ իսկական հաղթողի հոգեբանություն:

Հետևեք NEWS.am Medicine-ին Facebook-ում և Twitter-ում