ԱՄԲ միջոցով բեղմնավորված երեխաները ավելի հաճախ են սրտի արատներ ունենում. հետազոտություն

Երեխաների շրջանում, որոնք բեղմնավորվել են ԱՄԲ/ԻՔՍԻ (արտամարմնական բեղմնավորում/սերմնաբջջի ներցիտոպլազմատիկ ներարկում) միջոցով, սրտի բնածին արատների հավանականությունը 45 տոկոսով բարձր է նրանց համեմատությամբ, որոնք բնական ճանապարհով են բեղմնավորվել: Այս մասին հայտնում են IRCCS San Raffaele Hospital-ի (Իտալիա) գիտնականները:

Ultrasound in Obstetrics and Gynecology ամսագրում հրապարակված հետազոտության շրջանակում գիտնականները վերլուծել են հրապարակված 8 հետազոտությունների տվյալներ, որոնց մասնակցել է ԱՄԲ-ի միջոցով բեղմնավորված 25 856 եւ բնական ճանապարհով բեղմնավորված 287 995 երեխա: Հետազոտողները սրտի բնածին արատների 2289 դեպք են հայտնաբերել (1.30 տոկոս ԱՄԲ/ԻՔՍԻ միջոցով բեղմնավորված երեխաների խմբում եւ 0.68 տոկոս՝ բնական ճանապարհով բեղմնավորվածների խմբում):

Մասնագետների կարծիքով՝ ԱՄԲ դեպքում սրտի արատների հավանականությունը մեծանում է վաղ ընկերքային անբավարարության պատճառով: Բայց սա հաստատելու համար հետագա հետազոտություններ են անհրաժեշտ: Գիտնականները ԱՄԲ/ԻՔՍԻ միջոցով հղիացած բոլոր կանանց խորհուրդ են տալիս պտղի էխոկարդիոգրաֆիա կատարել:

Հետևեք NEWS.am Medicine-ին Facebook-ում և Twitter-ում