Հայերը գնում են Վրաստան բուժվելու եւ վերադառնում են դեղերի մեկ տարվա պաշարով. Սամվել Զաքարյան

Մարդիկ հիմա  Հայաստանից մեկնում են Վրաստան բուժվելու, գնում այնտեղ դեղեր, ռեաբիլիտացիա են անցնում, այնուհետ մեկնում են Քոբուլեթի՝ լողալու, արեւայրուկ ընդունելու համար եւ դեղերի մեկ տարվա պաշարով Հայաստան են վերադառնում:

Այս մասին մարտի 24-ին հայտարարել է ՀՀ դեղարտադրողների և ներմուծողների միության տնօրեն Սամվել Զաքարյանը՝ ելույթ ունենալով դեղերի դեղատոմսերով վաճառքի նոր կարգի առիթով բժիշկների "Նախաձեռնող խմբի" կողմից կազմակերպված քննարկմանը:

Նա հավելել է, որ ցանկացած սահմանափակում առաջացնում է մաքսանենգության աճ, իսկ դեղերի մաքսանենգությունը հղի է բազմաթիվ վտանգներով՝ սկսած դեղերի պահպանման եւ փոխադրման կանոնների խախտման հետեւանքով սպառնալիքներից՝ վերջացրած կենսաահաբեկչությամբ:

Սամվել Զաքարյանն իր ելույթի ընթացքում առողջապահական կազմակերպություններին առաջարկել է միավորվել եւ երկրի բարձրագույն ղեկավարությանը բողոք ներկայացնել առողջապահության նախարարության աշխատանքի ոճի կապակցությամբ, որը փորձեր է անում երկրի բնակչության եւ մասնավոր հատվածի վրա:

Նա նշել է, որ առողջապահության նախկին նախարարները որոշումների կայացման ժամանակ սերտորեն համագործակցել են դեղագործական ընկերությունների ներկայացուցիչների հետ, ինչը չի կարելի ասել վերջին երկու նախարարների` Արմեն Մուրադյանի եւ Լեւոն Ալթունյանի մասին, ովքեր  ընտրեցին «մենք ասում ենք, դուք անում եք» սկզբունքը: Նա նշել է, որ առողջապահության նախարարությունը այսօր պնդում է, որ դեղատոմսերի մասին վերջերս ընդունված կարգը քննարկվել  է մասնագետների լայն շրջանակի հետ, մինչդեռ նա չգիտի այդ քննարկումներին մասնակցած դեղագործների կամ բժիշկների:

«Ոչ ոք կասկածի տակ չի դնում դեղատոմսերի դուրս գրման անհրաժեշտությունը, բայց մեզ հետ ոչ ոք չի խորհրդակցել, թե ինչպես դա անել», - ասել է նա:

Նա ներկաներին հավաստիացրել է, որ եթե բժիշկները միանան, այլ ոչ թե իրենց սենյակներում նստած բողոքեն, ապա անպայման հաջողության կհասնեն:

Նա հավելել է, որ նույնը վերաբերում է եւ դեղագործներին՝ տեղեկացնելով, որ այժմ կառավարության հետ բանակցություններ են ընթանում ԱԱՀ-ից դեղերը ազատելու մասին, քանի որ երկրում բնաչության 35 տոկոսն ապրում է աղքատության շեմից անդին, եւս 35 տոկոսը՝ աղքատության շեմին, իսկ դեղը սոցիալական նշանակության ապրանք է:

Ըստ նրա՝ Ֆինանսների նախարարության հիմնական փաստարկն այն է, որ ներմուծողները ԱԱՀ-ից ազատվելու դեպքում դեղերի գները չեն նվազեցնի: Նա առաջարկել է դեղագործական ընկերություններին գրավոր ձեւով հավաստիացնել կառավարությանը, որ իրենք պատրաստ են գների զգալի նվազեցման: Սակայն 58 կազմակերպություններին ուղարկված նամակի տակ ներկայումս ընդամենը չորսն են ստորագրել ընդհանուր անհավատության պատճառով, որ այս կերպ կարող են ինչ-որ բան փոխել: «Հավատացեք, հնարավոր է, իմ փորձը դա հաստատում է», - ասել է նա:

Ըստ Սամվել Զաքարյանի՝ Հայաստանում օտարերկրյա դեղագործական ընկերությունների ներկայացուցչությունները նոր կանոնների պատառով արդեն լուրջ խնդիրներ են ունեցել: Ընդամենը մի քանի օր առաջ GlaxoSmithKline-ի ներկայացուցչությունից նամակ է ստացվել, որ այն փակվում է:

Բոլորը գիտեն, հավելել է նա, որ ներկայացուցչությունները աշխատում են բժիշկների հետ, բայց նոր կարգը զրկում է բժիշկներին բրենդային դեղերը նշանակելու հնարավորությունից: Այժմ այս իրավունքը փոխանցվել է դեղատներին, եւ դեղատներում արդեն հայտնվել են բժշկական ներկայացուցիչներ, ովքեր այցելում են բժիշկներին եւ առաջարկում են հիվանդներին ուղարկել իրենց մոտ, խոստանալով դեղերը վաճառել առանց դեղատոմսի: «Եթե պայքարում էին բժիշկների դեմ կոռուպցիայի համար, ապա այժմ այդ կոռուպցիան գնում է դեղատներ», - ասել է նա:

Հետևեք NEWS.am Medicine-ին Facebook-ում և Twitter-ում