Ո՞ր պաղպաղակն է ավելի օգտակար

Կաթնային պաղպաղակն ավելի առողջարար է, քան սերուցքային եւ պլոմբիր պաղպաղակը, քանի որ այն ունի ավելի քիչ կալորիա եւ ճարպ: Կաթնային պաղպաղակը, ըստ փորձագետների, կարելի է ուտել շաբաթը 2-3 անգամ՝ առանց վնասելու առողջությունը եւ մարմնի տեսքը:

Ռուսաստանի Դաշնային բժշկակենսաբանական գործակալության Թունաբանական ինստիտուտի Բուժական սննդի կլինիկայի դիետոլոգ, բժշկական գիտությունների թեկնածու Ելենա Լիվանցովան պնդում է, որ պաղպաղակի մեկ չափաբաժինը չպետք է գերազանցի 100 գրամը, հաղորդում է «ՌԻԱ Նովոստին»:

«Լավագույն տարբերակը բնական պաղպաղակն է, որը պարունակում է արհեստական հավելումների, կոնսերվանտների եւ արոմատիզատորների նվազագույն քանակ: Այսինքն, որքան փոքր է բաղադրիչների ցանկը, այնքան ավելի լավ»,-ավելացրեցրել է Լիվանցովան:

Պաղպաղակն ունի նաեւ օգտակար հատկություններ. Այն պարունակում է կալցիում եւ ֆոսֆոր, որոնք ապահովում են առողջ ոսկորներ եւ ատամներ, ինչպես նաեւ կալիում եւ մագնեզիում, որոնք անհրաժեշտ են սրտանոթային համակարգի աշխատանքի համար: Պաղպաղակն ունի նաեւ B խմբի վիտամիններ, որոնք բարենպաստ են ազդում կենտրոնական նյարդային համակարգի վրա: Միեւնույն ժամանակ, պետք չէ մոռանալ, որ պաղպաղակն օգնում է արտադրել սերոտին եւ դոֆամին, որոնք բարելավում են տրամադրությունը:

Պաղպաղակը վնասակար հատկությունները, այնուամենայնիվ, եւս ունի, քանի որ այն սառն է եւ կարող է գրգռել ստամոքսը։ Կաթնային պաղպաղակից պետք է հրաժարվեն նաեւ նրանք, ովքեր վատ են տանում կաթնային շաքարը (լակտոզ) եւ ճարպակալման հետ կապված խնդիրներ ունեն։

Հետևեք NEWS.am Medicine-ին Facebook-ում և Twitter-ում