Արդյոք պարտադի՞ր է ժամկետանց մթերքը թափել: Դրանցից որո՞նք է կարելի ուտել, իսկ որոնք՝ ոչ:
Ձու
Ձուն արտաքին ազդեցությունից պաշտպանված է կճեպով, որի շնորհիվ այն բավականին երկար է թարմ մնում, նույնիսկ եթե սառնարանում չպահվի, քանի որ բակտերիաները դրսից ձվի մեջ չեն թափանցում:
Կարելի՞ է արդյոք ձուն ուտել, եթե փաթեթի վրա նշված պիտանիության ժամկետն անցել է: Մասնագետներից ոմանք անվտանգ լինելը ստուգելու այսպիսի եղանակ են առաջարկում՝ եթե ձուն ջրի մեջ սուզվում է, ուրեմն կարելի է ուտել, իսկ եթե ջրի վրա լողում է, ապա ձվի մեջ օդ է անցել, եւ ձուն պետք է թափել:
Պանիր
Կարծիք կա, որ պանրի պինդ տեսակներն ուտելու համար անվտանգ են պահման ժամկետի լրանալուց հետո 6 շաբաթ, եթե սառնարանում են պահվում: Պանրի փափուկ տեսակները պիտանիության ժամկետը լրանալուց հետո կարելի է ուտել մինչեւ ընդհուպ մեկ շաբաթ, եթե փաթեը չի բացվել, իսկ եթե այն արդեն բացել եք, ապա ավելի քիչ: Փափուկ պանրի վրա սնկերի եւ բորբոսի առաջանալու դեպքում, այն չի կարելի օգտագործել:
Հաց
Սառեցված հացը կարելի է 6 ամիս պահել: Սենյակի ջերմաստիճանի պայմաններում հացի պահման ժամկետը շատ ավելի քիչ է. եթե հացի հոտը փոխվել է եւ բորբոս է առաջացել, այն պետք է թափել՝ անկախ այն հանգամանքից, թե պիտանիության ինչ ժամկետ է նշված:
Միս
Մսի պահման ժամկետի տեւողությունը կախված է տեսակից: Սառցախցիկում միսը կարելի է պահել շատ երկար, նույնիսկ տասնամյակներով: Սակայն սովորական սառնարանում եւ առավել եւս սառնարանից դուրս այն կարելի է շատ կարճ ժամկետով պահել:
Թռչնամիս
Նույնիսկ սառնարանում պահելու դեպքում հավի փափկամիսը չարժի սնունդի մեջ օգտագործել ավելի ուշ, քան պահման նշված ժամկետից մեկ օր հետո: Հում թռչնամսի մեջ կարող են լինել մեծ քանակությամբ բակտերիաներ, ներառյալ կամպիլոբակտերիա եւ սալմոնելա, որոնք բավականին արագ են բազմանում մինչեւ վտանգավոր մակարդակ՝ անգամ սառնարանում պահելու դեպքում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր