Բակտերիալ ինֆեկցիաները կարող են քաղցկեղ առաջացնել. հետազոտություն

Բակտերիալ ինֆեկցիաները կարող են քաղցկեղ առաջացնել, պարզել են Շառլոտայում Հյուսիսային Կարոլինայի համալսարանի (ԱՄՆ) գիտնականները:

MedicalXpress-ում հրապարակված հաղորդագրության մեջ նշված է, որ գիտնականների կարծիքով՝ չարորակ ուռուցքների զարգացման գործոններից մեկը բակտերիաների եւ MUC1 գլիկոպրոտեինների միջեւ փոխգործակցությունն է, որն արտադրում են լորձաթաղանթների բջիջները: Սա կարող է բերել մի ամբողջ շարք ուռուցքային հիվանդությունների զարգացման, այդ թվում՝ հաստ աղիքի, թոքերի, ստամոքսի, լյարդի եւ ենթաստամոքսային գեղձի քաղցկեղի:

Ինչպես հայտնի է, բոլոր չարորակ նորագոյացությունների մոտ 20 տոկոսը կապված է որեւիցե վիրուսային կամ բակտերիալ ինֆեկցիայի հետ, ընդ որում՝ հիմնական պատճառը քրոնիկական բորբոքումն է:

Մուցինների սպիտակուցային միացությունները, որոնց է դասվում MUC1-ը, պաշտպանում են մարսողական համակարգի ներքին մակերեւույթը: Բակտերիաներն ամրանում են MUC1 հատուկ դոմենին, որն անջատվում է մոլեկուլից եւ հայտնվում լորձաշերտի մեջ, որտեղ տեղի է ունենում մանրէների վերացումը: Սակայն որոշ դեպքերում միացությունը կարող է գործարկել ախտածին ազդանշաններ բջջի ներսում, որոնք իրենց հերթին ակտիվացնում են քաղցկեղածիններին:

Հետևեք NEWS.am Medicine-ին Facebook-ում և Twitter-ում