Հայրենիք վերադարձած ռազմագերիները ստանում են անվճար հոգեբանական օգնություն

Ադրբեջանում գերության մեջ գտնվելուց հետո հայրենիք վերադարձած մեր մի քանի համաքաղաքացիներն արդեն ստանում են անվճար հոգեբանական եւ հոգեբուժական օգնություն: «Դեպի կյանք» նախաձեռնության շրջանակում հայ մասնագետներն այդպիսի օգնություն են առաջարկում վերադարձած բոլոր ռազմագերիներին, ինչպես նաեւ մյուս զինծառայողներին եւ քաղաքացիական անձանց, որոնք տուժել են ռազմական գործողությունների հետեւանքով:

Հոգեբան եւ հոգեբույժ Արամ Հովսեփյանը NEWS.am Medicine-ի հետ զրույցում հայտնեց, որ Հայաստան վերադարձած ռազմագերիների հետ արդեն երեկ անցկացվել են առաջին սեանսները: Նրանց հոգեկան առողջության մասնագետների մոտ են ուղարկել բժիշկները, որոնք նրանց հետազոտել են վերադառնալուց հետո:

Մասնագետի խոսքով՝ գերության մեջ եղած մարդկանց մեծամասնությունը բախվում է տարբեր հոգեբանական խնդիրների, ուստի վերադարձածներին խորհուրդ է տրվում գոնե մեկ անգամ լինել հոգեբանի մոտ, նույնիսկ եթե նրանց թվում է, թե իրենց մոտ ամեն ինչ կարգին է: Որպես կանոն, առաջացած խնդիրները մեծապես կախված են այն հանգամանքից, թե մարդը որքան երկար է մնացել գերության մեջ, ինչպիսի պայմաններում են նրան պահել, ինչպես են նրան վերաբերվել, ինչպիսի հանգամանքներում են նրան հայրենիք վերադարձրել, եւ շատ այլ գործոններից:

Մասնագետի խոսքով՝ ռազմագերիներից շատերը բախվում են քնի խանգարումների, դեպրեսիվ վիճակների, տարբեր վախերի: Շատերի համար դժվար է վերապրածից հետո վերադառնալ բնականոն կյանքին եւ հարմարվել: Շատ տարածված են նաեւ հետվնասվածքային սթրեսային խանգարումները:

«Գերության մեջ երկար ժամանակ անցկացնելը, երբ ցանկացած պահի քո կյանքին կարող է վտանգ սպառնալ, երբ քեզ շրջապատում է տոտալ անորոշությունը, տեղեկատվության պակասը՝ այս ամենը հանգեցնում է երկարատեւ սթրեսի կուտակման, եւ սա միանգամայն բնական է ու սպասելի: Ոմանք ավելի լավ են հարմարվում համանման իրավիճակներում, մյուսներն՝ ավելի վատ: Երկու դեպքում էլ խորհուրդ է տրվում թեկուզ մեկ անգամ այցելել մասնագետի: Մենք նրանց մեր ծառայությունները մատուցում ենք բացարձակապես անվճար եւ հնարավոր ամեն ինչ անում ենք, որ այդ մարդիկ ազատվեն տագնապ հարուցող խնդիրներից եւ կարողանան հնարավորինս արագ վերադառնալ բնականոն կյանքին»,- ասաց Արամ Հովսեփյանը:

Մասնագետի խոսքով՝ բնականոն կյանքին ռազմագերիների վերադարձի գործում իր ավանդը կարող է ունենալ նաեւ հանրությունը. դրա համար անհրաժեշտ է... նրանց չպահել ուշադրության կենտրոնում՝ հիմա նրանք այդպիսի ուշադրության կարիք ամենեւին չունեն:

Հետևեք NEWS.am Medicine-ին Facebook-ում և Twitter-ում