Որոշ մարդկանց թվում է, թե երեխաների ներկայությամբ տանը մերկ կամ կիսամերկ քայլելը լավ միտք է, քանի որ երեխան պետք է սեռականության մասին տեղեկություններ տանը ստանա, այլ ոչ՝ դրսում: Առաջին հայացքից մոտեցումը բավականին տրամաբանական է թվում, բայց պարզվում է, որ սեքսոլոգները դրա հետ այնքան էլ համամիտ չեն:
Սեքսապաթոլոգ Սեւադա Հակոբյանը կարծում է, որ երեխան չպետք է մերկ մարմին տեսնի, առավել եւս եթե խոսքը ծնողներին է վերաբերում:
Ի՞նչ խնդիրներ կարող են առաջանալ, եթե երեխան մերկ մարմին տեսնի: Պարզվում է, երեխայի հոգեսեռական զարգացումը բավականին վաղ հասակում է սկսում, եւ նույնիսկ 2-3 տարեկան երեխային արդեն չափազանց հետաքրքիր են սեռական օրգաններն ու այն ամենը, ինչ դրանց հետ է կապված: Բնականաբար, ավելի մեծ տարիքի մարդկանց սեռական օրգանները նրան նույնպես կհետաքրքեն, ինչը երեխայի չափազանց վաղ հոգեսեռական զարգացմանը նպաստող անցանկալի մարմնական խթան կարող է հանդիսանալ:
Այսինքն, տարիքին չհամապատասխանող տեղեկություններ ստանալով, երեխան ինտելեկտի, գիտելիքների եւ գուցե ցանկությունների առումով կարող է չափազանց արագ՝ մարմնասեռական զարգացմանը եւ հորմոնների մակարդակին անհամապատասխան զարգանալ:
Սեքսապաթոլոգ Սեւադա Հակոբյանի համոզմամբ, ցանկալի է, որ երեխաները նույնիսկ պատահականորեն մերկ մարմին չտեսնեն: Եւ, իհարկե, տանը մերկ քայլելը սեռակրթության լավագույն տարբերակը չէ:
Այսինքն՝ ցանկալի է, որ երեխայի՝ սեռականության մասին գիտելիքները նրա տարիքին եւ մարմնասեռական զարգացմանը համապատասխան լինեն:
Իսկ թե ինչպես է կարելի պատմել երեխային այն մասին, թե որտեղից է նա հայտնվել, կարող եք կարդալ NEWS.am Medicine-ի այս հոդվածում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր