Վիժումը կնոջը փրկել է մահացու հիվանդությունից

Շոտլանդիայի բնակչուհուն մահացու հիվանդությունից փրկել է վիժումը, գրում է BBC News-ը։

35-ամյա Լաուրա Ստրատերնը հղիացել է 2020 թվականի սեպտեմբերին։ Հղիության 12-րդ շաբաթում նա գնացել է հերթական հետազոտության եւ իմացել, որ պտղի սրտխփոցը դադարել է։ Մի քանի օր անց Լաուրան վիժել է։ Դրանից հետո նա արձակուրդ է վերցրել՝ վերականգնվելու համար:

Այդ ժամանակ նա իր աջ կրծքին կապույտ երակ է նկատել եւ մտածել, որ դա հղիության հետեւանք է։ Մի քիչ սպասելով՝ Լաուրան դիմել է թերապեւտին, իսկ վերջինս նրան ուղարկել է կրծքագեղձերի բուժման մեջ մասնագիտացած կլինիկա։ Կլինիկայում կնոջ մոտ կրծքագեղձի քաղցկեղ են կասկածել։ Հաջորդ հետազոտությունները հաստատել են կասկածները եւ ցույց տվել, որ քաղցկեղը տարածվել է ավշյան հանգույցների վրա։

Քանի որ ուռուցքը չափազանց մեծ է եղել, այն հնարավոր չի եղել անմիջապես վիրահատել։ Ստրատերնին քիմիաթերապիայի կուրս են նշանակել, որից հետո վիրահատական ​​ճանապարհով հեռացրել են ուռուցքի մնացորդները։

«Սա քաղցկեղի երրորդ փուլն էր, բայց հաջողվեց հաղթել այն։ Բժիշկներն ասացին, որ ես պետք է երախտապարտ լինեմ չծնված երեխայիս ինձ փրկելու համար»,- ասել է Լաուրան եւ հավելել, որ դժվար թե այլ իրավիճակում դիմեր բժշկի։

Այժմ կինը մտադիր է պարբերաբար հետազոտվել եւ մամոգրաֆիա անել։ Նա խորհուրդ է տվել հոգ տանել առողջության մասին եւ պարբերաբար զննել մարմինը՝ արձանագրելով տեղի ունեցող փոփոխությունները։

Հետևեք NEWS.am Medicine-ին Facebook-ում և Twitter-ում