Թարթելու արագության նվազումը կարող է վկայել Պարկինսոնի հիվանդության մասին. Daily Mail

Թարթման նորմալ հաճախականության նվազումը (րոպեում 14-17 անգամից պակաս) կարող է  Պարկինսոնի հիվանդության զարգացման նշան լինել: Այս մասին հայտնում է Daily Mail-ը՝ վկայակոչելով Պարկինսոնի հիվանդությունների ամերիկյան ասոցիացիայի (APDA) բժշկական անձնակազմի կարծիքը։

Հստակեցվում է, որ մարդկանց մոտ թարթման նորմալ հաճախականությունը րոպեում մոտ 14-17 անգամ է։ Թարթելը աչքերը խոնավ պահելու և եղջերաթաղանթի մակերեսը մաքրելու բնական մեխանիզմ է։ Որոշ ուսումնասիրություններ ցույց են տվել, որ թարթման արագությունը արտացոլում է դոֆամինի (նեյրոհաղորդիչ) ակտիվությունը ուղեղում: Որքան ցածր է դոֆամինի մակարդակը, այնքան երկար են կոպերի փակման միջակայքերը:

Պարկինսոնի հիվանդությունների ամերիկյան ասոցիացիայի մասնագետների կարծիքով՝ այս հիվանդության բնորոշ հատկանիշը դոֆամին արտադրող նյարդային բջիջների կորուստն է։ Նման անցանկալի փոփոխությունները կարող են ոչ միայն դող առաջացնել, այլև նվազեցնել թարթման հաճախականությունը։

Նշվում է նաև, որ հազվադեպ կոպերի փակումը կարող է վկայել մեկ այլ պաթոլոգիայի՝ Գրեյվսի հիվանդության մասին: Սա աուտոիմուն հիվանդություն է, որն առաջանում է վահանաձև գեղձի ցրված հյուսվածքի կողմից վահանաձև գեղձի հորմոնների ավելորդ սեկրեցմամբ:

Հետևեք NEWS.am Medicine-ին Facebook-ում և Twitter-ում