Ավստրիացի տղամարդը կացնով կտրել է սեփական առնանդամը՝ հոգեմետ սնկերի ազդեցության տակ

Ավստրիացի տղամարդը կացնով կտրել է սեփական առնանդամը՝ հոգեմետ սնկերի ազդեցության տակ։ Բարեբախտաբար բժիշկները կարողացել են նորից կարել կտրված օրգանը։ Հիվանդի ցնցող պատմությունն իր տեսակի մեջ առաջինն է, հայտնում է PsyPost.org-ը։

Նշվում է, որ 37-ամյա տղամարդը հոգեկան խանգարման պահին տառապում էր դեպրեսիայից և ալկոհոլի չարաշահումից։

Պսիլոցիբինը, այսպես կոչված, «կախարդական» սնկերի մեջ բնական միացություն է, որը կարող է մարդկանց գցել հալյուցինացիոն վիճակի մեջ: Այն գործում է՝ փոխելով ուղեղի սերոտոնինի ընկալիչները, մարդու զգացմունքներն ու ուժեղացնելով հույզերը:

Վերջերս ավանդական բժշկությունը գիտակցել է psilocybin սնկերի թերապևտիկ օգուտները, քանի որ հետազոտությունները ցույց են տալիս, որ դրանք կարող են օգնել բուժել հոգեբանական խանգարումներ ունեցող հիվանդներին, մասնավորապես՝ դեպրեսիան, անհանգստությունը, կախվածությունը և հետտրավմատիկ սթրեսային խանգարումը (ՀՏՍԽ):

Ընդսմին սունկը վերոնշյալ հիվանդի վրա այլ ազդեցություն ունեցավ: Սա պսիլոցիբինին առնչվող Կանդինսկի-Կլերամբոյի համախտանիշի առաջին փաստագրված դեպքն է, երբ հոգեկան անկայուն մարդը վնասում է սեփական սեռական օրգանները:

Ֆելդկիրխի հիվանդանոցի բժիշկները հայտնել են, որ հիվանդը, որն այդ պահին մենակ է եղել իր ամառանոցում, կերել է չորսից հինգ չորացրած սունկ, ինչը կարճատև հոգեկան խանգարում է առաջացրել, որի ընթացքում նա սեփական առնանդամը կացնով բաժանել է մի քանի կտորների:

Ավելի ուշ տուժածին նկատել է ոմն քաղաքացին, երբ նա դուրս է եկել իր տնից՝ օգնություն խնդրելու: Սարսափելի դեպքից մոտ 5 ժամ անց նրան ծայրահեղ ծանր վիճակում տեղափոխել են մոտակա հիվանդանոց: Տղամարդը արյունահոսությունը դադարեցնելու համար փորձել է իր առնանդամի շուրջը մի կտոր փաթաթել, իսկ օրգանի մնացած մասը դրել է ձյունով լցված տարայի մեջ։

Բժիշկները ստիպված են եղել խնամքով մաքրել կտրված օրգանը կեղտից ու ձյունից, և նրանք կարողացել են վերականգնել ծայրը և մոտ երկու մատնաչափ «ցողունը»։ Մյուս մասերը նորից կցվելու համար չափազանց վնասված էին:

Հիվանդը մղձավանջային իրադարձությունը չի կարողացել լիովին վերհիշել:

Վիրահատությունից անմիջապես հետո տղամարդը հայտնվել է մասնագետ հոգեբույժների հսկողության տակ, քանի որ մոտ մեկ շաբաթ շարունակ նա տառապել է փսիխոզի նոպաներից: Ապաքինվելուց հետո նա վերականգնումը շարունակել է ուրոլոգիական բաժանմունքում։

Առաջացել են բարդություններ, այդ թվում՝ նեկրոզ (մաշկային հյուսվածքի մահ), որը ժամանակի ընթացքում ապաքինվել է։ Վիրահատությունից մի քանի ամիս անց նրա էրեկցիայի ու միզուղիների ֆունկցիաները ևս վերականգնվել են։

Հետևեք NEWS.am Medicine-ին Facebook-ում և Twitter-ում