Բազմիցս լսել ենք, որ ծխելը վնասակար է առողջության համար, որ այն կարող է սիրտ-անոթային խնդիրներ եւ քաղցկեղ առաջացնել: Բայց քչերը գիտեն, որ ծխելը՝ ինչպես ակտիվ, այնպես էլ՝ պասիվ, վնասակար է նաեւ տեսողության համար:
Պատասխանելով NEWS.am Medicine-ի թղթակցի հարցին, բժիշկ-ակնաբույժ Լուսինե Բեկիրսկա-Թամազյանը պատմել է, թե սիգարետի ծխի ազդեցությամբ աչքերի հետ կապված ինչ խնդիրներ կարող են առաջանալ:
Ակտիվ ծխելու վնասները
Ծխախոտի ծխի մեջ պարունակվող նյութերը, ինչպես հայտնի է, անոթները խցանելու հատկություն ունեն: Ընդ որում, մասնագետի մեկնաբանմամբ, խոսքը ոչ միայն սիրտը կամ գլխուղեղը, այլեւ աչքերը սնուցող անոթներին է վերաբերում: Դրանց պատերին արյան հոսքը սահմանափակող կուտակումներ են առաջանում: Աչքի սնուցումը վատանում է, ինչի հետեւանքով մի շարք լուրջ խնդիրներ կարող են առաջանալ:
Պասիվ ծխելու վնասները
Տեսողության տեսանկյունից ակտիվ ծխելը պասիվից անհամեմատ ավելի վնասակար է, սակայն վերջինս էլ կարող է մի շարք խնդիրների առաջացման պատճառ դառնալ, որոնցից ամենահասարակը աչքի չորացումն է: Ծխով լի սենյակում մարդու աչքերը չորանում են, սկսում են շուտ հոգնել, ինչը բացասաբար է անդրադառնում մարդու կյանքի որակի եւ աշխատանքի արդյունավետության վրա, կարող է գլխացավեր եւ այլ խնդիրներ առաջացնել:
Աչքերի չորացման դեպքում մասնագետը խորհուրդ է տալիս օրգանի մակերեսը արհեստական արցունքներով խոնավեցնել, հնարավորինս շատ զբոսնել եւ, իհարկե, հնարավորինս հեռու մնալ ծխից:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր