նախընտրելի դարձնել
Ըստ որոշ փորձագետների՝ եթե տուբերկուլոզը բավականաչափ վաղ է բացահայտվում, ապա բուժվելու հավանականությունը ավելի մեծ է:
Որո՞նք են տուբերկուլոզի ախտանիշները: Ո՞ր ախտանիշի դեպքում պետք է դիմել բժիշկի: NEWS.am Medicine-ի թղթակցի այս եւ նման այլ հարցերին պատասխանել է Առողջապահության նախարարության տուբերկուլոզի դեմ պայքարի Ազգային կենտրոնի տնօրեն Արմեն Հայրապետյանը։
Ահա հիմնական ախտանիշները, որոնք կարող են օգնել հայտնաբերել տուբերկուլոզը.
1. Երկարատեւ հազ
2. 37.0-37.5 աստիճան ջերմություն
3. Գիշերային քրտնարտադրություն
4. Ընդհանուր թուլություն
5. Ինքնազգացողության վատթարացում
6. Քաշի նվազում
7. Մկանային ցավեր
Նման ախտանիշների դեպքում որքան հնարավոր է շուտ պետք է դիմել տեղամասային պոլիկլինիկա, որտեղ մասնագետները կզննեն պացիենտին եւ, եթե կասկած առաջանա, կուղարկեն հետագա հետազոտությունների:
Հայաստանում տուբերկուլոզի ախտորոշումը եւ բուժումը անվճար է։ Ինչպես նշեց Արմեն Հայրապետյանը, բոլոր ծախսերը հոգում է կառավարությունը, մասնավորապես, առողջապահության նախարարությունը:
Ինչ վերաբերում է բուժման տեւողությանը, դեղորայքազգայուն տուբերկուլոզի դեպքում բուժումը տեւում է մոտ 6 ամիս, իսկ հիվանդության դեղորայքակայուն տաբերակը բուժելու համար պահանջվում է մոտ 2 տարի։
Ո՞վ է ավելի հակված հիվանդանալու
Նախ եւ առաջ պետք է նշել, որ տուբերկուլոզով կարող է հիվանդանալ յուրաքանչյուր ոք՝ անկախ կենսական պայմաններից եւ այլ գործոններից: Տուբերկուլոզը տարածող միկոբակտերիաները ամենուր են, եւ նրանք բավական կայուն են տարատեսակ ազդեցությունների նկատմամբ:
«Այս միկոբակտերիաները կարող են ներթափանցել մեր օրգանիզմ, բայց եթե մեր իմունային համակարգը ուժեղ է, օրգանիզմը դիմակայում է դրանց», - ասաց Արմեն Հայրապետյանը: Սակայն անբարենպաստ պայմաններում, եթե իմունային համակարգը թուլացած է, հիվանդությունը կարող է արագորեն զարգանալ:
Այդուհանդերձ՝ ռիսկի խմբի մեջ են մտնում ՄԻԱՎ-ով հիվանդները, բանտարկյալները, թմրամոլները, փախստականները, մարդիկ, որոնք աշխատում են անբարենպաստ պայմաններում եւ այլք:
Ինչպե՞ս կանխել տուբերկուլոզը
Տուբերկուլոզով չվարակվելու համար պետք է նախ եւ առաջ ունենալ ուժեղ իմունային համակարգ: Իսկ ուժեղ իմունիտետ ունենալու համար, ինչպես Հայրապետյանն է ասում, պետք է ճիշտ սնվել, վարել առողջ ապրելակերպ եւ չչարաշահել վատ սովորությունները:
Պետք է նաեւ նշել, որ տղամարդկանց մոտ տուբերկուլոզով հիվանդանալու հավանականությունը 3 անգամ մեծ է, քան կանանց մոտ: Ինչպես նշում է Արմեն Հայրապետյանը՝ սա ամենայն հավանականությամբ պայմանավորված է այն հանգամանքով, որ տղամարդկանց մոտ վատ սովորությունները ավելի շատ են, որոնք էլ իրենց հերթին թուլացնում են իմունային համակարգը:
