նախընտրելի դարձնել
Տեսողության խանգարումները, գլխացավը, ուժեղ սրտխփոցը և քունքերում առկա ճնշումը կարող են զարկերակային ճնշման «թռիչքի» նշաններ լինել։ Այս մասին պատմել է բրազիլացի սրտաբան Վիլտոն Պաուլու Վիեյրան։ Փորձագետի խոսքերը մեջբերում է Metropoles պարբերականը։
Ըստ բժշկի՝ վաղ ազդանշաններից մեկը կարող է լինել տեսողության խանգարումը։ Բարձր ճնշման դեպքում փոխվում է աչքի ցանցաթաղանթում արյան հոսքը, ինչի պատճառով առաջանում են մշուշոտություն, վառ բծեր կամ կենտրոնացման դժվարություններ։ Հաճախ դրանց միանում են գլխացավը և սրտխառնոցը։
Մեկ այլ հնարավոր ախտանիշ է հևոցը: Վիեյրան բացատրել է, որ բարձր ճնշման դեպքում սրտի ծանրաբեռնվածությունը մեծանում է, ուստի մարդու համար կարող է դժվարանալ նույնիսկ առանց արտահայտված ֆիզիկական ակտիվության շնչառությունը: Այս ֆոնին երբեմն առաջանում է արագացած սրտխփոց և կրծքավանդակում ուժեղ հարվածների զգացողություն:
Հիպերտոնիայի այլ նշանների թվում սրտաբանը նշել է նաև անհանգստությունը կամ քունքերում առկա ճնշումը, գլխապտույտը և հավասարակշռության կորստի զգացումը: Սա կապված է այն բանի հետ, որ բարձր ճնշումը մեծացնում է արյունատար անոթների պատերի վրա ծանրաբեռնվածությունը, ինչը հանգեցնում է դրանց լայնացմանը և սպազմերին:
Բժիշկն ընդգծել է, որ նշված ախտանիշները միշտ չէ, որ նշանակում են ճնշման բարձրացում, սակայն դրանց հայտնվելու դեպքում արժե հնարավորինս շուտ չափել ցուցանիշները և անհրաժեշտության դեպքում դիմել բժշկական օգնության:
