նախընտրելի դարձնել
Եվրոպական հանձնաժողովը հակամենաշնորհային հետաքննություն է սկսել ֆրանսիական Sanofi դեղագործական ընկերության նկատմամբ՝ գրիպի դեմ պատվաստանյութի գովազդի ժամանակ ԵՄ մրցակցային կանոնները ենթադրաբար խախտելու համար, հաղորդել է AFP-ն։
Հետաքննությունը վերաբերում է Efluelda ապրանքանիշի ուժեղացված գրիպի դեմ պատվաստանյութի մարքեթինգին, որը նախատեսված է 60 տարեկանից բարձր անձանց համար և ներկայացվում է որպես ավելի արդյունավետ այդ տարիքային խմբի համար։ Դեղամիջոցը մրցակցում է ավստրալական CSL Seqirus ընկերության Fluad պատվաստանյութի հետ։
«Հանձնաժողովը մտահոգված է այն հանգամանքով, որ Sanofi-ն իրականացրել է մոլորեցնող կոմունիկացիոն արշավ, որի նպատակն է եղել վարկաբեկել Fluad-ը՝ այն ներկայացնելով որպես պակաս արդյունավետ Efluelda-ի համեմատ, ինչը հակասում է մի քանի անդամ պետություններում ազգային պատվաստումների երաշխավորություններին», - նշվել է Եվրոպական հանձնաժողովի հայտարարության մեջ։
Կարգավորող մարմնի տվյալներով՝ մարքեթինգային արշավը հիմնականում ուղղված էր Գերմանիայի և Ֆրանսիայի առողջապահության մասնագետներին, որտեղ Sanofi-ն ունի ուժեղ շուկայական դիրք։
Ընկերությունը ավելի վաղ արդեն տեղեկացրել էր ԵՄ հետաքննության մասին և հայտնել, որ վստահ է, որ օրենքը կպահպանվի։
«Sanofi-ն վստահ է, որ գործել և շարունակում է գործել բոլոր գործող օրենքներին և կանոնակարգերին, այդ թվում՝ մրցակցային կանոններին լիովին համապատասխան», - հայտարարել է ընկերությունը։
Ընկերությունը նաև հետաքննությունը որակել է որպես «գործընթացային քայլ», որը չի կանխորոշում դրա արդյունքը, և հաստատել է իր հանձնառությունը արդար մրցակցության և պացիենտների համար նորարարական պատվաստանյութերի հասանելիության հարցում։
Գրիպի պատվաստանյութերը Sanofi-ի բիզնեսի զգալի հատվածն են և լայնորեն օգտագործվում են ազգային պատվաստման ծրագրերում, մասնավորապես Ֆրանսիայում։ Եթե խախտումները հաստատվեն, Եվրոպական հանձնաժողովը կարող է տուգանք սահմանել գերիշխող դիրքի չարաշահման համար կամ պահանջել, որ ընկերությունը կատարի ուղղիչ պարտավորություններ։
