Գիտնականները Էբոլայի հնարավոր տարածման քարտեզն են կազմել. ռիսկի գոտում 15 երկրներ են

Օքսֆորդի համալսարանականները քարտեզ են մշակել՝ այն երկրների առանձնացմամբ, որոնց բնակիչները չղջիկների հետ շփման արդյունքում Էբոլա վիրուսով վարակման առավել մեծ վտանգի են ենթարկվում:

Washington Post պարբերականի հաղորդմամբ, գիտնականները, Էբոլա վիրուսի արձանագրման պահից ի վեր Կենտրոնական Աֆրիկայի երկրներում մի քանի անգամ մոլեգնած համաճարակների պատճառները վերլուծելով, այն եզրահանգման են եկել, որ հիվանդության տարածողները 22 երկրների անտառներում բնակվող չղջիկներն են, որոնք, ի տարբերություն մարդկանց եւ այլ կենդանիների, ընդամենը վիրուսային հաղորդչի դերակատարում ունեն, հաղորդում է Washington Post-ը: Այդ 22 երկրների մեջ են այն 7–ը, որոնք արդեն հայտնել են կենդանուց մարդուն վիրուսի փոխանցման մասին, եւ 15 այն երկրները, որոնց վտանգ է սպառնում։

Բանն այն է, որ մի շարք աֆրիկյան երկրներում չղջիկի միսը որպես սննդամթերք են օգտագործում: Այնպես որ, թե որսի, թե կերակրի պատրաստման, եւ սնման ընթացքում վիրուսի ձեռքբերման հավանականություն է գործում:

Հավաքագրված տվյալների հիման վրա գիտնականներն այն եզրահանգման են եկել, որ Էբոլա հեմոռագիկ տենդը բարձր հավանականությամբ կարող է Նիգերիայում, Կարերունում, Կենտրոնական Աֆրիկյան Հանրապետությունում, Գանայում, Լիբերիայում, Սիերա-Լեոնեում, Անգոլայում, Տոգոյում, Տանզանիայում, Եթովպիայում, Մոզամբիկում, Բուրունդիում, Հասարակածային Գվիենայում, Մադագասկարում եւ Մալավիում տարածվել:

Առայժմ վարակման դեպքեր են արձանագրվել Լիբերիայում, Սիերա-Լեոնեում, Գվինեայում, Նիգերիայում, Կոնգոյի Ժողովրդավարական Հանրապետությունում եւ Սենեգալում:

ԱՀԿ-ի կողմից ստացված վերջին տեղեկությունների համաձայն, մահացու վտանգավոր վիրուսի զոհերի թիվը 2400-ի է հասել:

Հետևեք NEWS.am Medicine-ին Facebook-ում և Twitter-ում