ԱՄՆ Տեխասի համալսարանի Առողջապահության գիտական կենտրոնի և Շվեդիայի Լունդ համալսարանի բժշկական հետազոտողների թիմը պարզել է, որ հղիության ընթացքում լուրջ բարդություններ ունեցող կանայք ծննդաբերությունից հետո երկար տարիներ վաղաժամ մահվան ռիսկի են ենթարկվում: Հետազոտության արդյունքները հրապարակվել են JAMA Internal Medicine ամսագրում:
Նախորդ հետազոտությունները ցույց են տվել, որ այն երեխաները, որոնք ծնվել են առողջական բարդություններ, մասնավորապես պրեէկլամպսիա ունեցող մայրերից, մահանալու ավելի բարձր ռիսկի են ենթարկվում ծննդաբերությունից առաջ, ընթացքում և հետո: Սակայն նման մայրերի երկարաժամկետ հեռանկարների մասին քիչ բան է հայտնի:
Այս նոր աշխատանքում հետազոտական թիմը փորձել է պարզել՝ արդյոք հղիության և/կամ ծննդաբերության ընթացքում լուրջ խնդիրներն ի վիճակի են ազդելու մայրական մահացության մակարդակի վրա: Դա պարզելու համար գիտնականներն ուսումնասիրել են Շվեդիայում 1973-2015 թվականներին ծննդաբերած 2,2 միլիոն կանանց բժշկական փաստաթղթերը: Տվյալների բազան պարունակում էր նաև տեղեկություն նույն կանանց առողջական վիճակի մասին՝ նրանց հասունացմանը զուգընթաց:
Գիտնականները պարզել են, օրինակ, որ հղիության ընթացքում շաքարախտից տառապող կանանց մահացության մակարդակն աճել է մինչև 53%, իսկ վաղաժամ ծննդաբերած կանանց շրջանում՝ 41%-ով։ Պարզվել է նաև, որ միջինից ցածրահասակ երեխաներ լույս աշխարհ բերածների շրջանում այդ ցուցանիշն աճել է 30%-ով:
Արյան հիվանդություններից տառապող, սակայն պրեէկլամպսիայի հետ առնչություն չունեցող կանանց և պրեէկլամպսիայից տառապող կանանց շրջանում այս ցուցանիշն աճել է համապատասխանաբար 27%-ով և 13%-ով:
Հետազոտողները հաշվի են առել նաև ցուցանիշների վրա ազդելու ունակ այլ գործոններ, ինչպիսին են շրջակա միջավայրը և գենետիկան՝ ուսումնասիրության մեջ ներառելով եղբայրներին ու քույրերին:
Գիտնականները միաժամանակ պարզել են, որ որոշ կանանց շրջանում մահացության աճը շարունակվել է նաև տարեց հասակում:
Հետազոտողները հանգել են այն եզրակացության, որ բժիշկները իրենց հիվանդների առողջական վիճակը գնահատելիս պետք է հաշվի առնեն հղիության բարդությունները:
Նրանք ընդգծել են, որ անհրաժեշտ են ավելի շատ հետազոտություններ՝ պարզելու համար, թե ինչու են նման կանայք մահանալու ավելի մեծ ռիսկի ենթակա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր