Աֆրիկացիները միառժամանակ Ավստրալիա մուտք գործելու արտոնագիր չեն ստանա

Ավստրալիայի իշխանությունները, Էբոլա հեմոռագիկ տենդի՝ երկրում տարածումը կանխարգելելու նպատակով, Արեւմտյան Աֆրիկայի երկրների քաղաքացիներից ստացված՝ մարդասիրական կամ իմիգրացիոն նկատառումներով մուտքի արտոնագիր ձեռք բերելու հայցադիմումներն անպատասխան թողնելու մասին որոշում են կայացրել: Այս մասին տեղեկությունը, Medical Daily-ի վկայակոչմամբ, երկրի ներգաղթի նախարար Սքոթ Մորիսոնն է հաղորդել:

Ավստրալիայում մինչ այժմ մահացու վտանագավոր հիվանդությամբ վարակման ոչ մի դեպք չի արձանագրվել: Թեեւ վարակակիր լինելու կասկածով հոսպիտալացումներ եղել են, որոնցից վերջինը նախօրեին 18-ամյա աֆրիկացի կնոջ նկատմամբ է ի իրականացվել: Բոլոր դեպքերում բժշկական հետազոտությունների արդյունքում վիրուսի առկայությունը հերքվել է:

Նախարարի հաղորդմամբ, մինչ կառավարության որոշման պահը մուտքի արտոնագիր ձեռք բերած եւ դեռեւս Ավստրալիա չժամանած աֆրիկացիները երկրի սահմանները հատելուն պես պետք է 21 օր տեւողությամբ կարանտինի հանձնվեն:

Ընթացիկ տարվա մարտ ամսից Արեւմտյան Աֆրիկայի մի շարք երկրներում մոլեգնող համաճարակի զոհերի թիվը, վերջին տվյալներով, շուրջ 5 հազարի է հասնում:

Տենդի ինկուբացիոն շրջանը կարող է մինչեւ 3 շաբաթ տեւել, որից հետո գլխավոր ախտանշանները՝ բարձր ջերմությունը, փսխումն ու փորլուծություն են ի հայտ գալիս, իսկ հիվանությունն էլ սկսում է վարակիչ դառնալ: Վիրուսը մարդուց մարդու օրգանիզմից արտանետված հեղուկ զանգվածների, մասնավորապես՝ արյան եւ թքի միջոցով է անցնում: 

Հատկանշական է, որ պաշտոնական Կանբերրան 18 մլն ավստրալական դոլար (15,8 մլն ԱՄՆ դոլար) է հատկացրել՝ հիվանդության դեմ միջազգային պայքարին, բայց եւ որոշ բժշկական շրջանակների ու ընդդիմադիր օրենսդիրների քննադատությանն արժանացել՝ վտանգավոր հիվանդությամբ վարակված տարածաշրջան մասնագիտացված խմբեր չուղարկելու համար:

Հետևեք NEWS.am Medicine-ին Facebook-ում և Twitter-ում