2016թ. ապրիլին Օնկոգինեկոլոգների եվրոպական կոնգրեսի ժամանակ «Նաիրի» բժշկական կենտրոնի Օնկոգինեկոլոգիական ծառայության ղեկավար Արտեմ Ստեփանյանը պատմել է իրենց կլինիկայում իրականացված մի բացառիկ վիրահատության` լապարոսկոպիկ եղանակով տոտալ մեզոմետրիալ ռեզեկցիայի մասին: Արտեմ Ստեփանյանը NEWS.am Medicine-ի թղթակցի հետ զրույցում պատմել է, որ այն աշխարհում նման վիրահատության մասին երրորդ զեկույցն էր, ինչը Հայաստանի համար բավականին պատվաբեր է:
Բժիշկը պարզաբանել է, որ տոտալ մեզոմետրիալ ռեզեկցիան արգանդի վզիկի քաղցկեղի բուժման տեխնիկապես բավականին բարդ, բայց ավելի քիչ տրավմատիկ մեթոդ է, որն առաջարկել է Լայպցիգի համալսարանական կլինիկայի ղեկավար, պրոֆեսոր Միխայել Հյոկելը: Տվյալ վիրահատության արդյունքները 15-20% գերազանցում են աշխարհում ընդունված ստանդարտ մոտեցումների արդյունքները: Այս տեխնիկան կիրառվում է Գերմանիայում, այն էլ ոչ բոլոր կլինիկաներում, իսկ ամբողջ աշխարհում արգանդի վզիկի քաղցկեղի բուժման «ոսկե ստանդարտ» մինչեւ հիմա համարվում է Վերտհայմի վիրահատությունը: «Նաիրի» ԲԿ-ում Հյոկելի նոր տեխնիկան կիրառում են արդեն մեկ տարուց ավելի եւ նույնիսկ կարողացել են կիրառել ոչ թե բաց, այլ լապարոսկոպիկ եղանակով:
Ի դեպ, Արտեմ Ստեփանյանին տարբեր երկրներից պարբերաբար հրավիրում են մաստեր կլաս անցկացնելու համար:
Բժիշկը պարզաբանել է, որ առհասարակ լապարոսկոպիկ օնկոգինեկոլոգիական վիրահատությունները (արգանդի վզիկի, արգանդի մարմնի եւ սկզբնական փուլի ձվարանի քաղցկեղ) «Նաիրի» ԲԿ-ի հաղթաթուղթն են, Հայաստանի որեւէ այլ բժշկական հաստատությունում նման վիրահատություններ չեն արվում: Ձվարանի քաղցկեղի վերջին փուլերում հաջողությամբ կատարում են նաեւ ավելի ծավալուն եւ բաց վիրահատություններ, այս դեպքում հիվանդների ապրելիության վիճակագրական թվերը բավական բարձր են:
Արտեմ Ստեփանյանը պատմել է, որ կլինիկայում յուրաքանչյուր հիվանդի համար հատուկ Tumor Board է ստեղծվում, որի կազմում ընդգրկվում են բոլոր այն մասնագետները, որոնք այս կամ այն կերպ առնչվում են ուռուցքային հիվանդի հետ` ճառագայթաբաններ, ուռուցքային վիրաբույժներ, ընդհանուր վիրաբույժներ, ուռոլոգներ, քիմիաթերապեւտներ եւ այլն: Նրանք բոլորը խորհրդակցելով որոշում են տվյալ հիվանդի բուժման անհատական ռազմավարությունը եւ պլան կազմում: Բարդ դեպքերում board -ի աշխատանքներում ընդգրկվում են արտասահմանցի անդամները, որոնք իրենց ոլորտում «կարծիքի առաջատարներ» (opinion leaders) են:
Որակյալ բուժման համար կարեւոր է բուժանձնակազմի պրոֆեսիոնալ մակարդակը. ծառայության բոլոր բժիշկները պարբերաբար վերապատրաստվում են եվրոպական երկրներում: Արտեմ Ստեփանյանի խոսքով «Նաիրի» ԲԿ-ն զինված է ախտորոշման եւ բուժման վերջին սերնդի սարքավորումներով: Այդ ամենը հնարավորություն է տալիս դասվել եվրոպական առաջատար բժշկական հաստատությունների շարքին։
Բժիշկը հավաստիացնում է, որ հայ հիվանդները կարիք չունեն իրենց ամբողջ ունեցվածքը վաճառել արտասահմանում բուժվելու համար։ «Գոնե այդ ուղղությամբ մենք կարող ենք երաշխավորել` Եվրոպա մեկնելու կարիք չկա: Ես բազմիցս ուսումնասիրել եմ եվրոպական կլինիկաներում բուժվող հիվանդների էպիկրիզները, եւ ամեն անգամ համոզվել եմ, որ «Նաիրի» բժշկական կենտրոնում մենք նույն չափանիշներով ենք աշխատում», - ասել է նա:
Մեր զրույցի օրը Արտեմ Ստեփանյանը արտասահմանից երկու հիվանդի էր ընդունում, մեկը՝ Մոսկվայից, մյուսը` Լոս Անջելեսից:
«Նաիրի» ԲԿ-ի օնկոգինեկոլոգիական ծառայությունը տարեկան ավելի քան 300 վիրահատություն է կատարում, դրանց կեսից ավելին չարորակ ուռուցքների հեռացման վիրահատություններ են:
Առհասարակ կանանց մոտ տարածվածությամբ առաջին տեղում կրծքագեղձի քաղցկեղն է: Արգանդի վզիկի, էնդոմետրիումի եւ ձվարանի քաղցկեղը միասին՝ երկու անգամ ավելի քիչ են հանդիպում, քան կրծքագեղձինը։ Տարածվածությամբ երկրորդ տեղում էնդոմետրիումի քաղցկեղն է, ապա արգանդի վզիկի եւ ձվարանի քաղցկեղը:
Արտեմ Ստեփանյանը նշում է, որ ծառայությունը հիմնականում շեշտը դնում է սեռական օրգանների ուռուցքների բուժման վրա, որովհետեւ այստեղ ավելի բարդ տեխնիկա է պահանջվում: Ինչ վերաբերում է կրծքագեղձի քաղցկեղին, դրա բուժումը Հայաստանում ընդհանուր առմամբ բավարար մակարդակի վրա է, այստեղ նորմալ մրցակցություն կա, ոլորտն ապամենաշնորհված է:
Արտեմ Ստեփանյանը նաեւ Youtube-ում ալիք ունի, որտեղ տեղադրում է իր վիրահատությունների տեսանյութերը: Ալիքն արդեն ավելի քան 150 հազար դիտում է ունեցել, ընդ որում վիրահատությունները դիտում են բժիշկներ մոլորակի տարբեր ծայրերից, ինչը ոգեւորում է բժշկին։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր