Պեղումների ժամանակ հայտնաբերված բակտերիաները ռեզիստենտ են հակաբիոտիկների մեծ մասի հանդեպ

Աշխարհի ամենաերկար քարանձավներից մեկում՝ ԱՄՆ-ի Լեչուգիլյայում իրականացվող պեղումների ժամանակ McMaster University-ի եւ The University of Akron-ի գիտնականները եզակի բակտերիաներ են հայտնաբերել: Այս բակտերիաները, որոնք ստացել են Paenibacillus անունը, 4 մլն տարի շարունակ արտաքին աշխարհից մեկուսացված են եղել, սակայն ինչ-որ կերպ կայուն են մնացել ներկայումս գոյություն ունեցող հակաբիոտիկներից 18-ի նկատմամբ, այդ թվում՝ նաեւ «վերջին տեսակի» հակաբիոտիկների նկատմամբ, որոնք միայն ամենածայրահեղ դեպքերում են օգտագործվում, երբ մյուս դեղամիջոցներն անզոր են:

Կարելի է եզրակացնել, որ էվոլյուցիան Paenibacillus-ներում պաշտպանական մեխանիզմներ է մշակել առաջին հակաբիոտիկներից բխող պոտենցիալ սպառնալիքի երեւան գալուց շատ ավելի վաղ:

Մեխանիզմների հետազոտության ընթացքում, որոնց օգնությամբ Paenibacillus-ը պաշտպանվում է դեղամիջոցների ազդեցությունից, հետազոտողները 5 պոտենցիալ ուղղություն՝ 5 մեխանիզմներ են հայտնաբերել, որոնք այդ միկրոօրգանիզմները կարող են գործարկել իրենց կենսունակության պահպանման համար:

Այս մեխանիզմները հետազոտելով՝ գիտնականները կարող են նախապես հակաբիոտիկներ մշակել, որոնց դեմ այդ պաշտպանությունը չի գործի:

Լեչուգիլյա քարանձավն իր անկայունության պատճառով երկար ժամանակ այցելությունների համար փակ էր: Այնտեղ մտնել էին թույլատրում միայն գիտնականներին, եւ հասանելիության սահմանափակումը նրանց հնարավորություն է ընձեռել հետազոտելու մանրէների զարգացումը, որոնց կենսագործունեության վրա մարդկային ակտիվությունը չի ազդել: Paenibacillus բակտերիաները հայտնաբերվել են 1000 ֆուտ (մոտ 300 մետր) խորությամբ:

Հետևեք NEWS.am Medicine-ին Facebook-ում և Twitter-ում