Մասնավոր կենտրոններին հոգեբուժության պետպատվեր չեն տրամադրում, նրանց օգնում են հիմնադրամները. հոգեբույժ

Եթե բժշկական գործը բարձր մակարդակի վրա է, հոգեբուժության մեջ զսպման միջոցների կարիք գործնականում չկա, երկարատեւ ստացիոնար բուժման անհրաժեշտություն եւս չկա, այն կարելի է կազմակերպել ամբուլատոր մակարդակով: Այս մասին NEWS.am Medicine-ի հետ զրույցում հայտարարեց «Ալֆա-Բետա» ախտորոշման կենտրոնի հոգեբուժական ծառայության ղեկավար Անահիտ Գեւորգյանը՝ մեկնաբանելով Հայաստանի օմբուդսմենի զեկույցը հոգեբուժական հաստատությունների վիճակի մասին:

Նա նշեց, որ եթե երկրում հոգեկան խանգարումներով մարդկանց նկատմամբ խտրականություն կա, ապա այն չի կարող բարեկեցիկ համարվել: Իսկ օմբուդսմենի զեկույցը ցույց տվեց, որ այս իմաստով մեզ մոտ շատ խնդիրներ կան:

Նրա խոսքով՝ առաջինն այն է, որ պետական հոգեբուժական հաստատություններում վճարովի ծառայությունները, որոնց անօրինականության մասին խոսել է օմբուդսմենը, անհավասարություն են ստեղծում վճարունակ եւ անվճարունակ հիվանդների միջեւ: Եթե հոգեբուժությունն, ըստ օրենքի, պետական դոտացիայով է աշխատում, սա նշանակում է, որ բյուջեում փող է նախատեսված յուրաքանչյուր քաղաքացու համար, եթե նրա մոտ հոգեկան առողջության հետ կապված խնդիրներ առաջանան: Հայաստանի օրենսդրությունը նաեւ նախատեսում է, որ ցանկացած մարդ իրավունք ունի ընտրելու իր բժշկին ու կլինիկան: Սակայն այս դրույթը խախտվում է, քանի որ Առողջապահության նախարարությունը մասնավոր բժշկական կենտրոններին հոգեբուժության մասով պետական պատվերներ չի տրամադրում:

«Օմբուդսմենի բարձրացրած հարցերը Հայաստանի համար ճակատագրական նշանակություն ունեն: Զարգացած երկրներում ամբուլատոր հոգեբուժական օգնությանն է ուղղվում ամբողջ ֆինանսավորման 85 տոկոսը, իսկ ստացիոնարին՝ ընդամենը 15 տոկոսը: Մինչդեռ մեզ մոտ ամբուլատոր բուժմանը տրամադրվում է ընդամենը փողի 5-7 տոկոսը: Սա խոսում է այն մասին, որ ծառայությունը զարգացած չէ եւ վատ վիճակում է»,- ասաց նա՝ հավելելով, որ պարբերաբար հոգեբուժարաններում են հայտնվում սրացումներով միեւնույն հիվանդները: Մինչդեռ, նոր մեթոդները թույլ են տալիս նույնիսկ շատ սուր վիճակներում հիվանդներին բուժել առանց հոսպիտալացնելու՝ նրանց սոցիումից չկտրելով:

Նա հավելեց, որ Առողջապահության նախարարության աջակցության բացակայությամբ «Ալֆա-Բետա» կենտրոնը ստիպված է հովանավորներ որոնել հիվանդների համար, որոնք ցանկացել են հենց իրենց դիմել, եւ վերջին շրջանում կենտրոնն աշխատում է Ucom բարեգործական հիմնադրամի հետ, որի աշխատանքի ոճը հոգեբույժին ուղղակի զարմացրել է: Նրա խոսքով՝ հիմնադրամը ղեկավարում են շատ պատրաստված մարդիկ, եւ նրանք ոչ միայն պարզապես փող են տալիս, այլ հետեւում են բուժման ամբողջ ընթացքին: Ըստ որում՝ հիմնադրամն իր գործունեությունը ոչ մի ձեւով չի ազդարարում: Նրա աջակցության շնորհիվ մի քանի հիվանդներ, այդ թվում՝ ապրիլյան պատերազմի մասնակից, կարողացել են բուժում ստանալ ամենաժամանակակից մեթոդներով ու դեղամիջոցներով:

Հետևեք NEWS.am Medicine-ին Facebook-ում և Twitter-ում