Ալցհեյմերի դեմ դեղամիջոցը կարող է գիտակցված երազատեսության պատճառ դառնալ. Ուսումնասիրություն

Գիտակցված երազները, երբ մարդը հասկանում է, որ նա քնած է եւ կարող է վերահսկել երազի ընթացքը, հազվադեպ երեւույթ է: Շատ գիտնականներ ուղիներ են փնտրում այդպիսի երազներ առաջացնելու համար, սակայն այս ուղղությամբ լուրջ հաջողություններ դեռ չկան: Սակայն այժմ University of Wisconsin-Madison-ի եւ Lucidity Institute-ի գիտնականները պնդում են, որ այդպիսի գիտակցված երազների առաջացման նոր եղանակ են հայտնաբերել, եւ այդ մեթոդը Ալցհեյմերի բուժման համար դեղամիջոցներ է ենթադրում:

Խոսքը Գալանտամին կոչվող դեղամիջոցի մասին է: Բացի Ալցհեյմերի հիվանդության բուժման մեջ կիրառվելուց, այն նաեւ պարբերաբար օգտագործվում է մկանային դիստրոֆիայի եւ կենտրոնական նյարդային համակարգի այլ հիվանդությունների բուժման համար: Փորձարկումը ցույց է տվել, որ գիտակցված երազներ տեսել է 4 մգ դեղամիջոց ընդունած մարդկանց 27 տոկոսը, եւ պլացեբո ընդունած մարդկանց՝ միայն 14 տոկոսը: Իսկ 8 մգ դեղամիջոց ընդունած խմբում գիտակցված երազներ տեսել է մասնակիցների 42 տոկոսը:

Դեղամիջոցի ազդեցությունը կապված է դրա՝ արագ քնի փուլում խոլիներգիկ ռեցեպտորի ակտիվության վրա ազդեցության հետ: Բացի այդ, դեղամիջոցը կարող է նաեւ արագացնել հիշողության համակարգերի աշխատանքը: Գիտակցված երազները, իրենց հերթին, կապված են հիշողության մեջ տեղեկատվությունը վերարտադրելու ավելի լավ արտահայտված ունակության, ճանաչողական հստակության, վերահսկողության, դրական հույզերի, սենսորային հստակության հետ:

Հետևեք NEWS.am Medicine-ին Facebook-ում և Twitter-ում