Ինչո՞ւ պետք է թեյը պատրաստել միայն եռման ջրով

Թեյ պատրաստելիս հարկավոր է խստորեն հետեւել արտադրողի հրահանգներին, ովքեր խորհուրդ են տալիս թեյի խոտը կամ խոտերի փունջը պատրաստել եռման ջրով։ Այս նշումը պետք է փնտրել թեյի փաթեթի վրա։ Այս մասին տեղեկացնում են Գերմանիայի Ռիսկերի գնահատման դաշնային ինստիտուտի մասնագետները։

Ինչպես գրում է «Ռոսիյսկայա գազետան», անգամ ամենաթանկ թեյի մեջ կարող են գտնվել վտանգավոր ախտածիններ, այդ թվում մանրէներ եւ սնկեր։ Իսկ թեյի որոշ ապրանքատեսակներում, ինչպես ցույց են տվել հետազոտությունները, եղել են սալմոնելայի հետքեր։

Հենց այդ պատճառով խորհուրդ է տրվում օգտագործել եռման ջուր՝ թողնելով, որ թեյը թրմվի 5 րոպե։ Նման ջերմային մշակումը թույլ կտա ոչնչացնել վտանգավոր ախտածինների մեծ մասը։

Սակայն թեյը չափից ավելի թրմել նույնպես չի կարելի. մի քանի ժամ հետո թեյն արդեն կորցնում է բոլոր օգտակար հատկությունները։

Հետևեք NEWS.am Medicine-ին Facebook-ում և Twitter-ում