Բեռնաթափման օրեր. Ի՞նչ մթերքներ արժե ուտել. Մասնագետի խորհուրդներ

Եթե ամանորյա տոներին շատ եք կերել եւ մի քանի ավելորդ կիլոգրամներ եք ձեռք բերել, լավ գաղափար կլինի կազմակերպել երկու, այսպես կոչված, բեռնաթափման օրեր, որոնք կօգնեն օրգանիզմը կարգի բերել: Իսկ ի՞նչ մթերքներ արժե ուտել բեռնաթափման օրերին: NEWS.am Medicine-ի հետ զրույցում իր կարծիքը ներկայացրեց դիետոլոգ-էնդոկրինոլոգ Հասմիկ Աբովյանը:

Մասնագետի խոսքով՝ կարելի է բեռնաթափման օր անցկացնել շաբաթը մեկ անգամ, ոչ ավելի հաճախ: Այդ օրը քաղցած մնալ չարժե եւ օրվա ընթացում անգամ պետք է ուտել մոտ 500-600 կալորիա: Ինչպես նշեց մասնագետը, առողջ մարդը կարող է իրեն թույլ տալ շաբաթը մեկ օր ուտել միայն մեկ մթերք: Իսկ ի՞նչ մթերք կարող է դա լինել:

Ամենատարածված տարբերակը «խնձորային բեռնաթափումն» է, որի ժամանակ ամբողջ օրվա ընթացքում միայն խնձոր են ուտում: Բայց իրականում բեռնաթափման օրվա համար խնձորը վատ ընտրություն է, պնդում է մասնագետը: Բանն այն է, որ խնձորի մեջ շաքար եւ պարզ ածխաջրեր շատ են պարունակվում, իսկ դա նշանակում է, որ դրանց գործածումը բարձրացնում է արյան մեջ գլյուկոզայի մակարդակը, իսկ որոշ ժամանակ անց մարդն իրեն կրկին քաղցած եւ էներգիայից զրկված է զգում: Հենց այս պատճառով խնձորային բեռնաթափման ժամանակ դուք անընդհատ քաղց եւ անհարմարավետություն եք զգում:

Բեռնաթափման օրը անընդհատ քաղցած չզգալու համար ավելի լավ է նախապատվություն տալ մթերքների, որոնք ապահովում են կուշտ լինելու երկարատեւ զգացողություն: Օրինակ՝ դա կարող է լինել եփած ձուն: Դիետոլոգի խոսքով՝ կարելի է օրվա ընթացքում ուտել 6 ձու եւ 3 ցիտրուսային միրգ՝ նարինջ կամ թուրինջ: Այսպիսի բեռնաթափումը հեշտ է հաղթահարվում, մասնագետի խոսքով՝ դրա պատճառով նաեւ խոլեստերինի հետ կապված խնդիրներ չեն առաջանում, եթե, իհարկե, այն չեք չարաշահում եւ դրան եք դիմում առավելագույնը շաբաթը մեկ անգամ:

Կաթնաթթվային մթերքների սիրահարները կարող են բեռնաթափման օրերին նաեւ կեֆիր խմել. ամբողջ օրվա ընթացքում կարելի է խմել 1,5-2 լիտր ցածր յուղայնությամբ կեֆիր:

Հասմիկ Աբովյանը հիշեցրեց, որ, այսպես կոչված, «մոնիսննդակարգերը», որոնց ժամանակ գործածում են միայն 1 կամ 2 մթերք, կարելի է դիտարկել միայն որպես բեռնաթափման օրեր. այսինքն՝ այդպես սնվել կարելի է միայն շաբաթը մեկ անգամ, իսկ մնացյալ բոլոր օրերին սնունդը պետք է բազմազան լինի, որ օրգանիզմը ստանա իրեն անհրաժեշտ բոլոր սննդարար նյութերը:

Հետևեք NEWS.am Medicine-ին Facebook-ում և Twitter-ում