Կարելի՞ է արդյոք պլանային պատվաստում կատարել, եթե ընտանքիում կորոնավիրուսով մարդ կա

Եթե երեխայի ընտանիքում որեւիցե ինֆեկցիոն հիվանդությամբ մարդ կա, դա սովորաբար պլանային պատվաստմանը հակացուցված չէ, եթե իր՝ երեխայի մոտ հիվանդության ախտանիշներ չկան: Սակայն կորոնավիրուսային ինֆեկցիայի դեպքում հարցն այլ է, լրագրողների հետ զրույցում ասաց Առողջապահության նախարարության իմունացման ծրագրի ղեկավար Գայանե Սահակյանը:

Նրա խոսքով՝ COVID-19-ը նոր ինֆեկցիա է, եւ դրա համավարակի ժամանակ չի կարելի առաջնորդվել այն նույն սկզբունքներով, որոնք օգտագործվում են այլ ինֆեկցիոն հիվանդությունների դեպքում:

Եթե երեխայի ընտանիքում կա կորոնավիրուսային ինֆեկցիայով մարդ, երեխան կարող է իր օրացուցային պլանային պատվաստումները ստանալ վարակված ազգականի առողջանալուց հետո 14 օր անց. հենց այդքան է սովորաբար տեւում հիվանդության ինկուբացիոն շրջանը:

Իսկ եթե կորոնավիրուսային ինֆեկցիայով վարակվել է երեխան, ապա նա պլանային պատվաստումները կկարողանա ստանալ միայն լիակատար ապաքինումից հետո:

Մասնագետը նաեւ նշեց, որ Հայաստանում երեխաներին մինչեւ պլանային պատվաստումները չեն թեստավորում կորոնավիրուսի ախտորոշման համար, քանի որ դա անիմաստ կլիներ. իրավիճակն արագ է փոխվում, եւ եթե այսօր մարդու մոտ կորոնավիրուս չկա, դա չի նշանակում, որ վաղը նա չի կարող դրանով վարակվել:

Հետևեք NEWS.am Medicine-ին Facebook-ում և Twitter-ում