Ինչպես են ֆիբրոզի կառուցվածքային առանձնահատկություններն ազդում սրտի աշխատանքի վրա

Ռուսաստանի առաջին նախագահ Բ.Ն. Ելցինի անվան Ուրալի դաշնային համալսարանի գիտնականները կատարել են սրտի վրա ֆիբրոզի կառուցվածքային առանձնահատկությունների ազդեցության վերաբերյալ աշխարհում առաջին հիմնարար ուսումնասիրությունը:

Ինչպես հայտնում է ՌԻԱ Նովոստին, ուսումնասիրության ընթացքում նրանց հաջողվել է հայտնաբերել ֆիբրոզի հետ կապված սրտային հյուսվածքի էլեկտրական գրգռման խախտումների օրինաչափություններ: Այս հայտնագործությունը ապագայում թույլ կտա գտնել տարբեր տեսակի առիթմիայի բուժման արդյունավետ մեթոդներ:

Սրտի ֆիբրոզը շարակցական հյուսվածքի պաթոլոգիական ընդարձակում է, որը զարգանում է ծերանալու, գիրանալու, դեպքում, սրտի կաթվածից հետո եւ մի շարք հիվանդությունների հետեւանքով: Այդ վիճակի դեպքում սրտի մեջ սպիի հյուսվածք է հայտնվում, որի ծավալը երբեմն հասնում է 40%-ի: Սպիի հյուսվածքը չի կարող նորմալ կերպով տարածել էլեկտրական գրգռման ալիքները, ինչը բացասաբար է ազդում սրտի կծկման վրա:

«Պարզվել է, որ գրգռման ալիքի խախտումները կախված են ոչ միայն սրտամկանի հյուսվածքի ֆիբրոզային տարրերի քանակից, այլ նաեւ դրանց երկարությունից, մկանային մանրաթելերի հանդեպ դիրքից եւ, ամենակարեւորը՝ գրգռման ալիքի ուղղությունից: Ֆիբրոզի կառուցվածքների համակողմանի վերլուծություն կենդանիների ֆիզիոլոգիական փորձերի միջոցով եւ առավել եւս կլինիկայում անհնար է, ուստի մենք օգտագործեցինք համակարգչային մոդելներ, որոնց վրա կարելի է ուսումնասիրել ֆիբրոզի կամայական հյուսվածքները՝ հասկանալու համար սրտամկանի ֆունկցիայի վրա դրա ազդեցության օրինաչափությունները»,- ասել է Ուրալի համալսարանի «Մաթեմատիկական մոդելավորումը ֆիզիոլոգիայի եւ բժշկության մեջ՝ գերհամակարգչային տեխնոլոգիաների օգտագործման միջոցով» լաբորատորիայի ղեկավար Օլգա Սոլովյովան։

Մասնագետները ստեղծել են ֆիբրոզի տարբեր կառուցվածքների եռաչափ մոդելավորում: Համակարգչային մոդելները գիտնականներին թույլ են տվել մանրամասնորեն վերլուծել առանձին բջիջների եւ սրտային ամբողջ հյուսվածքի էլեկտրական գրգռման գործընթացները:

Հետևեք NEWS.am Medicine-ին Facebook-ում և Twitter-ում