Աշնանը Հայաստանում գրիպի եւ սուր շնչառական հիվանդությունների սեզոնն է բացվում, որ միայն հաջորդ տարվա գարնան վերջին է ավարտվելու: ԱՆ հիվանդությունների վերահսկման եւ կանխարգելման ազգային կենտրոնի օդակաթիլային վարակների եւ հատուկ վտանգավոր վարակիչ հիվանդությունների համաճարակաբանության բաժնի պետ Լիանա Թորոսյանը մի քանի խորհուրդներ է տվել՝ գրիպի եւ սուր շնչառական հիվանդությունների դեմ պայքարի եւ դրանց կանխարգելման վերաբերյալ:
Առաջին հերթին, Լիանա Թորոսյանի խոսքով, պետք է հիշել, որ հիվանդ լինելու դեպքում ցանկալի չէ մանկապարտեզ, դպրոց կամ աշխատանքի հաճախել: Ավելի ճիշտ է ՝ տանը մնալ եւ բուժվել՝ երկու պատճառներով.
1. Աշխատավայր մեկնելու եւ ամբողջ օրն աշխատելու պարագայում հիվանդ մարդու վիճակն էլ ավելի է վատթարանում: Իսկ եթե տանը մնար, հեղուկներ խմեր եւ չծանրաբեռներ օրգանիզմը, հիվանդությունը 2-3 օրում կարող էր անցնել. «ոտքի վրա» անցկացնելու դեպում այն սովորաբար շատ ավելի երկար է տեւում եւ դժվարությամբ անցնում:
2. Աշխատանքի գնալով, հիվանդ մարդը նպաստավոր պայմաններ է ստեղծում՝ այլ մարդկանց վարակման համար: Աշխատակիցներին, դպրոցի եւ մանկապարտեզի սաներին չվարակելու համար նույնպես արժե մի քանի օր տանը մնալ եւ ապաքինվել:
Իսկ ինչպե՞ս կարելի է գրիպի ու սուր շնչառական վարակների առաջացումը կանխարգելել
Լիանա Թորոսյանը խորհուրդ է տալիս.
• Հաճախակի օդափոխել տարածքը;
• Վիտամիններով հարուստ սնունդ ընդունել;
• Խստորեն հետեւել անձնական հիգիենային, ձեռքերը հաճախակի լվանալ;
• Մեծ ծավալով հեղուկներ խմել;
• Հիվանդների հետ չշփվել:
Իսկ եթե գրիպի կամ մրսածության նախանշաններ եք նկատում, ինքնաբուժմամբ մի զբաղվեք, խորհուրդ է տալիս Լիանա Թորոսյանը: Ինտերնետային կայքերից օգտվելը նույնպես ցանկալի չէ, քանի որ բազմաթիվ աղբյուրներ խեղաթյուրված, ոչ մասնագիտական տեղեկատվություն են պարունակում: Ավելի ճիշտ է՝ տեղամասային պոլիկլինիկա այցելել եւ ճիշտ ու գրագետ նշանակումներ ստանալ: Իսկ եթե տեղամասային բժիշկին այս կամ այն պատճառով չեք վստահում, Լիանա Թորոսյանը հիշեցնում է, որ մասնագետին փոխելու հնարավորություն ունեք:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր