Շոգ եղանակը կարող է մեծացնել ագրեսիան այն մարդկանց մոտ, որոնք արդեն անբարենպաստ հուզական վիճակում են: Սակայն օդի բարձր ջերմաստիճանն ինքնին չի ազդում տրամադրության վրա։ Այս մասին Live Science պարբերականին պատմել է ԱՄՆ Կալիֆորնիայի համալսարանի գիտաշխատող Ռոբերտ Փիքմանսը։
Նոր հետազոտության ընթացքում Փիքմանսը և նրա գործընկերները փորձին մասնակցելու համար 900 կամավորի են հրավիրել։ Փորձարկվողներին բաժանել են երկու խմբի և տեղավորել 71,6 աստիճան Ֆարենհայթ (22 աստիճան Ցելսիուս) և 86 աստիճան Ֆարենհայթ (30 աստիճան Ցելսիուս) օդի ջերմաստիճաններ ունեցող երկու սենյակում։ Այնուհետև մասնակիցները ենթարկվել են որոշումներ կայացնելու և ճանաչողական կարողությունների վերաբերյալ ստանդարտ թեստերի:
Արդյունքները ցույց են տվել, որ ավելի տաք սենյակում գտնվող մարդիկ ավելի հաճախ են բողոքել քնկոտությունից, սակայն նրանց որոշումներ կայացնելու ունակությունը և հուզական վիճակը գրեթե չեն փոխվել:
Հետազոտության լրացուցիչ փուլում գիտնականները որոշել են մասնակիցների մոտ հուզական սթրես առաջացնել։ Սուբյեկտներին ասել են, որ նրանցից յուրաքանչյուրը վիրտուալ հաշվում որոշակի քանակությամբ միավորների սեփականատեր է դարձել (միավորները չեն հավասարեցվել դրամական պարգևի): Այնուհետև կազմակերպիչները հայտարարել են, որ յուրաքանչյուր մասնակից կարող է որոշակի քանակի միավորներ զրոյացնել իր հետ սենյակում գտնվող որևէ մեկի հաշվում: Ընդ որում, բոնուսները «ջնջել» որոշողը դրանից ոչ մի շահ չէր ստանում։
Պարզվել է, որ ավելի տաք սենյակում գտնվող մարդիկ ավելի հաճախ և ավելի հաճույքով էին միավորներից զրկում իրենց սենյակակիցներին։ Գիտնականները ենթադրել են, որ շոգ եղանակը կարող է մեծացնել ագրեսիան (ներառյալ թաքնված ագրեսիան) արդեն իսկ սթրեսի վիճակում գտնվող մարդկանց մոտ:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր