Արմավիրի բժշկական կենտրոնի ինֆեկցիոն բաժանմունքի վարիչ Անահիտ Պետրոսյանը բացառում է, որ նախորդ օրը՝ հունիսի 16-ին, Ջրաշենից իրենց հիվանդանոց տեղափոխված 4-ամյա Կարեինեն բժշկական սխալի հետեւանքով է մահացել: Այս մասին այսօր՝ հունիսի 17-ին, լրագրողների հետ զրույցում ասաց Անահիտ Պետրոսյանը:
«Մենք գործ ունենք ինֆեկցիոն տոքսիկ շոկի հետ, որը կարող է կայծակնային բնույթ կրել եւ անմիջապես զարգանալ: Մասիվ միկրոբների թափանցումը կարող է բերել շոկային վիճակի եւ կայծակնային մահվան: Երեխային իրենք ուշ են բերել հիվանդանոց: Գիշերվանից նա ունեցել է բազմաթիվ փսխումներ, ջերմությունը բարձրացել է, տվել են պարացետամոլ, սակայն գիշերը դիմելու փոխարեն դիմել են հաջորդ օրը ժամը 13:55-ին»,- ասաց բժշկուհին:
Անահիտ Պետրոսյանի խոսքով՝ երեխայի վիճակն ընդունվելիս եղել է միջին ծանրության, նա եղել է գունատ, լորձաթաղանթները՝ չոր: Նա վստահեցրեց, որ իրենք երեխային ցույց են տվել անհրաժեշտ առաջին օգնությունը, ինչից հետո երեխայի վիճակը մի փոքր լավացել է: Ինչպես պատմեց Անահիտ Պետրոսյանը՝ դրանից որոշ ժամանակ անց երեխայի մոտ փսխումները շարունակվել են, երկրորդ անգամ կատարվել է ստամոքսի լվացում, որից 10 րոպե հետո երեխայի մոտ սկսվել են տոնիկոկլոնիկ ցնցումներ, ապա մի քանի րոպե անց նա գունատվել է, անմիջապես Վերակենդանացման բաժանմունք տեղափոխվելուց հետո մահացել:
Երեխայի հարազատների պնդումները, թե երկրորդ անգամ ստամոքսի լվացում անելուց հետո երեխայի օրգանիզմից ջուրը դուրս չի եկել, բժշկուհու խոսքով, իրականությանը չեն համապատասխանում: Անդրադառնալով երեխայի տատիկի պնդմանը, որ Վերակենդանացման բաժանմունքի բժիշկը ասել է, որ երեխայի թոքերը ջրի մեջ են, բժշկուհին հորդորեց սպասել դատաբժշկական փորձաքննության եզրակացությանը:
Հիշեցնենք, որ ըստ առողջապահության նախարարության տարածած հաղորդագրության, հունիսի 16-ի կեսօրին Արմավիրի բժշկական կենտրոնի ինֆեկցիոն բաժանմունք է ընդունվել Ջրաշեն գյուղի 4-ամյա բնակիչ` ջերմություն, թուլություն, փսխում, լուծ ախտանշաններով: Վիճակը գնահատվել է միջին ծանրության` սուր աղիքային ինֆեկցիա նախնական ախտորոշումով։ Ստացել է վիճակին համապատասխան բուժում։ Երեկոյան կողմ փոքրիկի վիճակը կտրուկ վատացել է։ Տեղափոխելով վերակենդանացման բաժանմունք` մասնագետները համապատասխան միջոցներ են ձեռնարկել, սակայն երեխայի կյանքը փրկել չի հաջողվել: Երեխայի մահվան պատճառը դեռ պաշտոնապես չի հրապարակվում, կատարվում է դատաբժշկական փորձաքննություն:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր