Իտալացի նյարդավիրաբույժ Սերջիո Կանավերոն, որը նախատեսել է եկող տարի աշխարհում առաջին` գլխի փոխպատվաստման վիրահատությունը կատարել, պնդում է, որ միջոց է գտել` վերականգնելու անդամալույծ դարձած կենդանիների շարժունակությունը:
Հարավային Կորեայի գիտնականները եւ Սերջիո Կանավերոն հատուկ նյութի օգնությամբ «սոսնձել են» մկների, առնետների եւ շան վնասված նյարդերը: Այդ փորձարկումների մասին պատմում է գիտական Surgical Neurology International ամսագիրը:
Առաջին փորձարկման շրջանակում գիտնականները պոլիէթիլենգլիկոլ (ՊԷԳ) կոչվող քիմիական նյութ են ներարկել 8 մկան ողնուղեղի վնասված նյարդային հյուսվածքների միջեւ: Վերահսկիչ խմբից նույն քանակությամբ մկների սովորական ֆիզիոլոգիական լուծույթ են ներարկել: ՊԷԳ ստացած 8 մկից 5-ը վերականգնել է շարժվելու կարողությունը, եւ գիտնականները որոշել են, որ այդ նյութը կարող է օգնել սոսնձել նյարդային մանրաթելերը` ուղեղի ազդանշաններին հնարավորություն տալով հասնել վերջույթներին:
Երկրորդ փորձարկման շրջանակում վնասված ողնուղեղով առնետին ՊԷԳ են ներարկել եւ փոքրիկ գրաֆենային ժապավեններ են տեղադրել, որոնք պետք է ողնուղեղի երկու մասերն իրար միացնեին: Պրոցեդուրաներից երկու շաբաթ անց առնետը դարձյալ կարողացել է քայլել:
Երրորդ փորձարկման ընթացքում ՊԷԳ-ն օգտագործել են` սոսնձելու շան նյարդերը, որի ողնուղեղը 90 տոկոսով կտրատված էր: Պրոցեդուրայից երեք օր անց շունը կարողացել է մի քիչ շարժվել, երեք շաբաթ անց` քայլել, իսկ ավելի ուշ` պոչը շարժել:
Կանավերոյի խոսքով, այդ տեխնոլոգիան կօգնի մի քայլով մոտենալ անդամալույծ դարձած հիվանդի գլխի փոխպատվաստմանը: Սակայն շատ այլ գիտնականներ պնդում են, որ մեթոդը փորձարկվել է կենդանիների շատ փոքր քանակության վրա եւ առայժմ տվյալները բավարար չեն դրա արդյունավետության մասին որեւէ բան ասելու համար:
Հիշեցնենք, որ Սերջիո Կանավերոն նախատեսել է արդեն եկող տարի աշխարհում առաջին` գլխի փոխպատվաստման վիրահատությունը կատարել: Որպես կամավոր ներկայացել է ռուսաստանցի ծրագրավորող Վալերի Սպիրիդոնովը, որը տառապում է մկանային զարգացող դիստրոֆիայից, որը նրան հաշմանդամի սայլակին է գամել: Հիվանդության պատճառով Սպիրիդոնովն ի վիճակի չէ հոգ տանել իրեն եւ նրան մշտական օգնություն է անհրաժեշտ:
Ինքը` Վալերին խոստովանել է, որ իր սիրած աղջիկը դեմ է պրոցեդուրայի անցկացմանը, որի ընթացքում նախատեսված է Սպիրիդոնովի մարմինն ամրացնել դոնորական մարմնի: Նշենք, որ կենդանիների վրա նման վիրահատություններից ոչ մեկը հաջողությամբ չի ավարտվել. ստացողները չեն կարողացել կառավարել ուրիշի մարմինը եւ շուտով մահացել են:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր