Դպրոցական սնունդի կազմակերպման հարցում բուժքույրերը կարեւոր դեր են կատարում: Սակայն հայկական դպրոցներից շատերում դեռեւս բուժքույրեր չկան, իսկ այնտեղ, որտեղ կան, միշտ չէ, որ տեղյակ են, թե հատկապես որոնք են իրենց պարտականությունները: Այս մասին են վկայում հետազոտության նախնական արդյուները, որը հայկական 80 դպրոցներում անցկացրել է «Մոր եւ մանկան առողջության ալյանս»-ը, որը միավորում է մայրական եւ մանկական առողջության ոլորտում աշխատող մի շարք կազմակերպություններ:
Ալյանսի մեջ մտնող «Վստահություն» հասարակական կազմակերպությունը ղեկավարող մանկաբույժ Սուսաննա Հարությունյանը NEWS.am Medicine-ի հետ զրույցում նշեց, որ դպրոցական բուժքույրերը պետք է ամեն օր գնահատեն ճաշարանի բոլոր աշխատակիցների առողջական վիճակը. այն մարդիկ, որոնց մաշկին թարախային վերքեր կան կամ ինֆեկցիոն այլ հիվանդություններ ունեն, չպետք է մասնակցեն դպրոցական ճաշի կազմակերպմանը: Դրանից բացի, բուժքույրերը պետք է ճաշը համտեսեն մինչեւ երեխաներին մատուցելը: Նրանք նաեւ ամեն օր պետք է սնունդի նմուշ վերցնեն եւ այն 2 օր սառնարանում պահեն. եթե հանկարծ դպրոցում ինֆեկցիոն հիվանդություն բռնկվի, հնարավոր կլինի սնունդը ստուգել եւ պարզել՝ արդյոք ինֆեկցիան կապված է սնունդի հետ:
Այս ամենն իրականացվում է դպրոցների կեսից մի փոքր պակասում, որտեղ եղել են հետազոտության հեղինակները:
Դպրոցական բուժքույրերը նաեւ պետք է կանոնավորապես հետեւեն երեխաների աճին եւ որոշեն նրանց մարմնի զանգվածի ինդեքսը: Նորմայից շեղումներ հայտնաբերելիս բուժքույրերը պետք է երեխաներին ուղարկեն համապատասխան մասնագետների մոտ: Բնականաբար, սա եւս ոչ բոլոր դպրոցներում է կատարվում:
Ավելին՝ բուժքույրեր կան ոչ բոլոր դպրոցներում: Որոշ դպրոցներում շաբաթական մեկ կամ երկու անգամ մոտակա պոլիկլինիկաներից են բուժքույրեր այցելում: Նրանք դպրոցների աշխատակից չեն համարվում եւ նման մոտեցման դեպքում չեն կարող նշված պարտականությունները կատարել: Հաճախ նրանց նույնիսկ լրավճար չի տրվում դպրոցներ այցելելու համար, չնայած դա չի մտնում նրանց, որպես պոլիկլինիկայի բուժքրոջ, պարտականությունների մեջ:
Սուսաննա Հարությունյանի կարծիքով՝ անհրաժեշտ է որոշել եւ աշխատանքի նկարագրության մեջ ամրագրել, թե բուժքույրը դպրոցում քանի ժամ պետք է անցկացնի եւ որոնք են նրա պարտականությունները: Ավելին՝ ցանկալի է, որ բուժքույրը դպրոցի աշխատակից լինի եւ համապատասխան աշխատավարձ ստանա:
Նշենք, որ նախապես դպրոցներում անցկացվող մոնիթորիգի նպատակն էր պարզել, թե հայկական դպրոցներում ինչպիսին է տարրական դասարանների երեխաների սնունդի կազմակերպման վիճակը: Սակայն մոնիթորինգի ընթացքում մասնագետները ուշադրություն են դարձրել դպրոցների սանիտարական պայմանների վրա եւ նկատած խախտումները ընդգրկել իրենց հաշվետվության մեջ: Առայժմ հասանելի են միայն մոնիթորինգի նախնական արդյունքները, իսկ ամբողջական հաշվետվությունը, ինչպես ակնկալվում է, կներկայացվի հունիսի վերջին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր