Շաքարի բարձր բաղադրությամբ ըմպելիքները կարող են երեխայի հիշողության վրա՞ ազդել

Հետազոտությամբ պարզվել է, որ շաքարի բարձր բաղադրությամբ հարուստ ըմպելիքները կարող են ոչ միայն կարիես եւ հավելյալ քաշ առաջացնել, այլ նաեւ՝ ուղեղի առողջության վրա անդրադառնալ: Հարավային Քալիֆորնիայի համալսարանը ներկայացնող գիտահետազոտական խմբի անդամները, մասնավորապես, քացրահամ խմիչքների եւ հիշողության կորստի միջեւ կապն են հայտնաբերել, հաղորդում է Medical Daily-ն:

«Գաղտնիք չէ, որ վերամշակում անցած ածխաջրատները, հատկապես երբ ըմպելիքներին են ավելացվում, կարող են նյութափոխանակության խանգարումների հանգեցնել: Այդուհանդերձ, մանկական տարիքում մեծ քանակությամբ օգտագործվելու դեպքում, տարիներ անց դրանք կարող են, ուղեղի գործառույթների միջամտության եւ միջավայրին վերաբերող կարեւորագույն հիշողությունների կորստի առումով, նշանակալի վնաս հասցնել», - նշել է հետազոտական խմբի ղեկավար դոկտոր Սքոթ Կանոսկին: Այստեղ խոսքը միայն սովորական լիմոնադի մասին չէ. խնձորի եւ այլ մրգերի քաղցրացված հյութը, սպորտային ըմպելիքները եւ ցանկացած խմիչք, որ շաքարի բարձր պարունակությամբ է աչքի ընկնում, կարող է վնասակար հետեւանքների հանգեցնել:

Գիտահետազոտական խմբի անդամները լաբորատոր փորձարկումներ են իրականացրել երիտասարդ եւ չափահաս լաբորատոր առնետների շրջանում: Մասնավորապես, նրանց ֆրուկտոզի բարձր պարունակությամբ եգիպտացորենի օշարակ եւ սախարոզ է առաջարկվել՝ լիմոնադի ազդեցությունը կրկնօրինակելու համար: Մեկ ամիս անց իրականացված հետազոտության արդյունքները ցույց են տվել, որ թեեւ չափահաս առնետների մոտ ուղեղի աշխատանքի հետ կապված խախտումներ չեն նկատվում, դեռահասները հիշողության որոշակի կորստի են ենթարկվել:

Բացի հիշողության կորստից, ցածր տարիքի առնետների մոտ նաեւ ուղեղի՝ ծովաձիու տեսք ունեցող հատվածի՝ հիպոկամպի բորբոքում է նկատվել: Վերջինս ոչ միայն հիշողությունների ձեւավորման, կազմակերպման եւ պահպանման, այլ նաեւ դրանց՝ այս կամ այն զգացման հետ ասոցացման համար է պատասխանատու:

Իսկ ի՞նչ է նշանակում շաքարի բարձր բաղադրություն: Ո՞րն է ըմպելիքների մեջ առկա ածխաջրատների անվնաս շեմը:

Ընդհանուր առմամբ, ամերիկացիներն օրական 22 թեյի գդալ շաքար են ընդունում. տարեկան ստացվում է շուրջ 31 կգ: Խոսքը վերամշակման, ըմպելիքների պարագայում՝ պատրաստման ընթացքում ավելացված շաքարի մասին է. ասել է, թե՝ մրգերի մեջ առկա բնական շաքարի բաղադրությունը հաշվի չի առնվում: Իրականում, երեխաներն օրական 4 թեյի գդալից ավել շաքար չպետք է օգտագործեն: Դեռահաս աղջիկների եւ չափահաս կանանց համար ցանկալի շեմը 5 թեյի գդալ է կազմում, իսկ տղամարդկանց պարագայում՝ 9 գդալ: Մինչ ամերիկացի դեռահասներն օրական 34 թեյի գդալ են ընդունում:

Հետևեք NEWS.am Medicine-ին Facebook-ում և Twitter-ում