Դեպրեսիան կարելի է ասպիրինո՞վ բուժել

Քեմբրիջի համալսարանի գիտահետազոտական խմբերից մեկի նախաձեռնությամբ իրականացված հետազոտության արդյունքներն այն մասին են վկայում, որ ամենօրյա օգտագործման դեղամիջոցների, մասնավորապես՝ ասպիրինի եւ իբուպրոֆենի օգնությամբ հնարավոր է դեպրեսիայի արդյունավետ բուժում իրականացնել, հաղորդում է Daily Mail-ը:

Մասնագետներն այն եզրահանգմանն են եղել, որ մարդու իմունային համակարգը վճռորոշ դերակատարում ունի մտավոր առողջության հարցում, այնպես որ բորբոքումները կարող են հոգեկան հիվանդությունների առաջացման ռիսկի աճ խթանել: Ավելին՝ նրանց համոզմամբ, հակաբորբոքային դեղամիջոցները դեպրեսիվ վիճակներն արագ, հասանելի եւ անվտանգ եղանակով հաղթահարելու ներուժ են պարունակում:

Մարդու իմունային համակարգը ջերմաչափի գործառույթ է իրականացնում եւ, որոշ դեպքերում, մշտապես բարձր ակտիվություն ապահովում՝ կարծես օրգանիզմում ցածր մակարդակով, բայց եւ անխափան գործող ինֆեկցիա կարելի է գտնել: Այդպիսի իմունային համակարգով բնորոշվող մարդիկ դեպրեսիայի եւ փսիխոզի առաջացման առավել բարձր ռիսկի են ենթարկվում: Գիտնականները նաեւ զգուշացնում են, որ առավել մեծ թվով եւ երկարատեւ ինֆեկցիաների ենթարկված երեխաների մոտ չափահաս տարիքում դեպրեսիայի եւ փսիխոզի նկատմամբ հակում կարող է զարգանալ: Երեւույթի պատճառն այն է, որ, ի պատասխան ինֆեկցիայի, արյունը մեծ ծավալներով, բորբոքման մարկեր համարվող IL-6 սպիտակուցներ է ստանում, որոնց հետքերը երկար ժամանակ շարունակում են առկա մնալ եւ մի շարք ֆիզիկական եւ հոգեկան հիվանդությունների առաջացման ռիսկի աճ խթանել:

Այդուհանդերձ, գիտնականների խոսքով, դեռեւս վաղ է ինֆեկցիաների եւ դեպրեսիայի առաջացման միջեւ ուղիղ՝ պատճառահետեւանքային կապի առկայության մասին պնդել, քանի որ դրա համար հետագա հետազոտությունների կարիք է զգացվում:

Հետևեք NEWS.am Medicine-ին Facebook-ում և Twitter-ում