Նյարդաբանները գիտակցության ընդլայնման նոր եղանակ են հայտնաբերել

Սինեսթեզիան (համազգացողություն) ընկալմանն առնչվող երեւույթ է, որի առկայության պարագայում զգացողության մեկ օրգանի գրգռմանը ոչ միայն դրան հատուկ, այլեւ զգացողության մեկ այլ օրգանին համապատասխանող զգացումների  առաջացում է հետեւում: Այլ կերպ ասած, զգացողության տարբեր օրգաններից ծնվող ազդակները միահյուսվում են: 

Meddaily-ի հաղորդմամբ, այս ֆենոմենը յուրաքանչյուր 23-րդ մարդու մոտ կարելի է գտնել: 19-րդ դարի վերջին եւ 20-րդ դարի մեկնարկին սինեսթեզիայի բազմաթիվ գիտական հետազոտություններ են իրականացվել, սակայն երեւույթի առաջացման մեխանիզմները մինչ այժմ շարունակում են անհասկանալի մնալ: Համազգացողությամբ տառապող մարդիկ կարող են տառերի գույնը տեսնել, բառերի համը զգալ կամ էլ ձայների հատկանիշները գունային գամմային վերագրել:

Ամենայն հավանականությամբ, սինեսթեզիայի համար մարդու գեներն են պատասխանատու, թեւ այն կարող է նաեւ շրջակա միջավայրի սպեցիֆիկ գործոնների, օրինակ՝ գունավոր տառեր կրող մանկական խաղալիքների ազդեցությամբ ի հայտ գալ: Ընդ որում, վերը նշված պատճառները մեկը մյուսին չեն բացառում: Սուսեքսի համալսարանականները 9-շաբաթյա կրթական ծրագիր են մշակել՝ պարզելու համար, թե ինչ պայմաններում կարող են խնդրո առարկա ֆենոմենի հիմնական նախանշաններն ի հայտ գալ: Հետազոտությանը 14 կամավորներ են մասնակցել:

Հետազոտության ավարտին մասնակիցների մոտ գույների եւ տառերի միջեւ կայուն ասոցիացիաներ են ձեւավորվել: Նրանք նույնիսկ տարատեսակ հատկանիշներ են տվել տառերին. դրանցից մեկն, օրինակ, հանգիստ է թվացել, մյուսը՝ ձանձրալի:

Բացի այդ, կամավորների մոտ ինտելեկտի՝ միջինը 12 կետով աճ է արձանագրվել՝ ի համեմատություն համեմատական խմբում ներառված մասնակիցների, որոնք կրթական ծրագրի ազդեցությանը չեն ենթարկվել: Ճիշտ է՝ երեք ամիս անց մասնակիցները կորցրել են տառերի մասին մտածելիս գույներ տեսնելու կարողությունը:

Հետևեք NEWS.am Medicine-ին Facebook-ում և Twitter-ում