Պրոգեստերոնով բուժումը ուղեղի վնասվածքի հետեւանքների նվազեցման չի հանգեցնում

Ուղեղի լուրջ վնասվածք ունեցող հիվանդների շրջանում իրականացված երկու լայնածավալ հետազոտությունների արդյունքները ցույց են տվել, որ վթարից անմիջապես հետո պրոգեստերոնով հորմոնային բուժմամբ հնարավոր չէ վնասվածքի հետեւանքների նվազեցման հասնել, հաղորդում է FoxNews-ը:

882 հիվանդների նկատմամբ իրականացված փորձարկումները Ատլանտայում գործող էմորիի համալսարանի բժիշկներն են նախաձեռնել: Երկրորդ դեպքում կամավորների թիվը 1195-ի է հասել, իսկ նախաձեռնողը Նյու-Յորքի North Shore համալսարանական հիվանդանոցի գիտաշխատողներն են եղել: Երկու զեկույցներն էլ օրեր առաջ New England Journal of Medicine ամսագրում են հրապարակվել: 

Հետազոտությունների արդյունքները մեծ հիասթափություն են պատճառել փորձագետներին, քանի որ նախընթաց՝ կենդանիների նկատմամբ իրականացված փորձարկումները պրոգեստերոնի՝ ուղեղի գործառնականության պահպանմանը միտված հատկության մասին էին վկայել:

Գիտնականները նկատել են, որ ավտովթարից, ընկնելուց կամ որեւէ այլ տիպի վթարից հետո՝ առավելագույնը 4 ժամ անց ուղեղի ծանր վնասվածքի հետեւանքների նվազեցման նպատակով պրոգեստերոնով հորմոնային բուժում ստացած հիվանդները 6 ամսվա ընթացքում որեւէ առավելություն ձեռք չեն բերել՝ ի համեմատություն այն մասնակիցների, որոնց ընդամենը պլացեբո է նշանակվել:

Հետևեք NEWS.am Medicine-ին Facebook-ում և Twitter-ում