Թավշե արջուկները կարող են վտանգավոր լինել երեխայի առողջության համար

Թավշե արջուկները եւ մյուս փափուկ խաղալիքներն այնքան անվտանգ չեն, որքան կարող են թվալ առաջին հայացքից. դրանք հսկայական քանակության վտանգավոր մանրէներ են քողարկում, որոնք կարող են առաջացնել օրինակ սննդային թունավորում:

Ինչպես ցույց է տվել հակաբակտերիալ ապրանքներ արտադրող բրիտանական ընկերության անցկացրած հետազոտությունը՝ խաղալիքների 80 տոկոսի մեջ վխտում են վնասակար միկրոօրգանիզմներ, իսկ յուրաքանչյուր չորրորդ փափուկ խաղալիքը պարունակում է նույնիսկ արտաթորանքի հետքեր:

Այդ խաղալիքները երեխային ուղեկցում են զբոսանքի ժամանակ, մանկապարտեզում, երբ նա պառկում է քնելու: Դրանք հանգստացնում են նրան, երբ նա քմահաճ է: Փափուկ արջուկները կարող են լինել երեխաների լավագույն ընկերները, բայց միեւնույն ժամանակ դրանք պոտենցիալ վտանգ են ներկայացնում առողջության համար, հենց որովհետեւ երեխաները դրանց հետ շատ ժամանակ են անցկացնում: Եթե խաղալիքը չեն ախտահանում այն բանից հետո, երբ դրանով խաղում է հիվանդ երեխան, այդ խաղալիքից հետո կարող է վարակվել ամբողջ ընտանիքը: Ավելին՝ մանրէները կարող են պահպանվել խաղալիքում ու երեխայի ապաքինվելուց հետո նորից վարակել նրան:

Հետազոտողները պարզել են, որ փոքրիկների 90 տոկոսը պարբերաբար գետնին են գցում իրենց խաղալիքները, ինչի հետեւանքով դրանք արագ կեղտոտվում են ու վտանգավոր մանրէներ կուտակում: Ավելին՝ չորս փափուկ խաղալիքից երեքը չի լվացվում երեխայի հիվանդությունից հետո ու հինգից մեկը առհասարակ երբեք չի լվացվում: Միկրոկենսաբաններ հայտնաբերել են, որ մանկական խաղալիքների ավելի քան 80 տոկոսը վարակված է ստաֆիլակոկով, որը կարող է սննդային թունավորում առաջացնել: Բացի դրանից, ուսումնասիրված խաղալիքների գրեթե մեկ քառորդը պարունակում է կոլիֆորմաներ, ինչը վկայում է վնասակար օրգանիզմների հնարավոր ներկայության մասին:

«Այն ամենը, ինչին դիպչում են երեխաները, պետք է հիգիենիկ ու մաքուր պահվի, չնայած դա շատ դժվար է անել», - նշել է հիգիենայի հարցերով փորձագետ բժիշկ Լիզա Աքերլին:

Մասնագետը խորհուրդ է տալիս երեխաների փափուկ խաղալիքները լվանալ լվացքի մեքենայով, իսկ որպես լվացող միջոց օգտագործել հակաբակտերիալ նյութեր, որոնք սպանում են վնասակար մանրէների մինչեւ 99.9 տոկոսը: Ավելի լավ է այդ խաղալիքները լվանաք սպիտակեղենից առանձին, որպեսզի խաչաձեւ վարակում չկատարվի:

Հետևեք NEWS.am Medicine-ին Facebook-ում և Twitter-ում