Բացառիկ դեպք Հայաստանում. կինը քառյակ է ունեցել՝ երկու զույգ միաձվաբջիջ երկվորյակ

Բնական ճանապարհով քառյակով հղիանալու հավանականությունը գրեթե զրոյական է, որպեսզի քառյակ «ստացվի» անհրաժեշտ է, որ միանգամից չորս ձվաբջիջներ բեղմնավորվեն կամ էլ մեկ բեղմնավորված ձվաբջիջից մի քանի կենսունակ սաղմ ստացվի: Թե՛ առաջինը, թե՛ երկրորդը ծայրաստիճան հազվադեպ երեւույթներ են:

Մի քանի ժամ առաջ 27-ամյա Մարիամ Թունյանը լույս աշխարհ է բերել անհավանական քառյակի, որոնցով հղիացել էր բնական ճանապարհով: Պերինատոլոգիայի, մանկաբարձության ու գինեկոլոգիայի ինստիտուտի ղեկավար Ռազմիկ Աբրահամյանը NEWS.am Medicine -ի թղթակցին բացատրել է, որ կնոջ մոտ, ըստ երեւույթին, բեղմնավորվել էին երկու ձվաբջիջներ, որոնցից յուրաքանչյուրը կիսվել է՝ մեկից 2 տղա է ստացվել, երկրորդից՝ 2 աղջիկ, յուրաքանչյուր զույգի համար մեկական ընդերքով:

Հղիության 8-րդ շաբաթում Մարիամը, որը արդեն մեկ դուստր ուներ, իմացել է,որ եկրվորյակ է ունենալու: Ավելի ուշ նրան ասել են, որ իրականում նրա սրտի տակ երկու զույգ երկվորյակներ են՝ այսինքն քառյակ: Կնոջ խոսքով ինքն ու ամուսինը շատ են ուրախացել, երբ իմացել են այդ մասին, քանի որ շատ են սիրում երեխաների:

Երեխաները ծնվել են շտապ կեսարյան հատման միջոցով հղիության 33 շաբաթում, քանի որ մոր պտղաջրերը սկսել էին հոսել:

NEWS.am Medicine -ի թղթակցի հետ զրույցում նեոնատոլոգ Լուսինե Վարդապետյանը նշեց, որ առաջինը ծնված երեխան ամենաամուրն էր՝ նա ինքնուրույն է սկսել շնչել, բղավել, վերակենդանացման միջոցառումների կարիք չի ունեցել: Երկրորդի մոտ շնչառական անբավարարություն կար, ու վերակենդանացման միջոցառումների անհրաժեշտություն էր առաջացել: Երրորդ երեխան՝ աղջիկը, կայուն վիճակում էր, իսկ չորրորդը, եւս աղջիկ, վերակենդանացման միջոցառումների կարիք ուներ:

Երեխաների քաշը մոտավորապես 1400-ից 1800 գրամ էր ու հիմա նրանց վիճակը գնահատվում է որպես ծանր, բայց կայուն: Երեխաները գտնվում են վերակենդանացման բաժանմունքում ու մայրը, որը վերականգվում է վիրահատությունից հետո, դեռ չի տեսել նրանց:

Մարիամի կողքին՝ ինտենսիվ թերապիայի բաժանմունքում, պառկած է 28-ամյա Շուշանիկ Ասադյանը, որը սեպտեմբերի 1-ին եռյակ է լույս աշխարհ բերել: Իրենց միջեւ տեղադրված բժշկական սարքավորումների միջից դժվարությամբ իրար տեսնելով՝ կանայք քննարկում են իրենց երեխաներին՝ թե նրանց, որոնք տանն են սպասում, թե անհավանական եռյակին ու քառյակին, որոնք նոր են ծնվել: Հետաքրքիր է, որ Շուշանիկը նույնպես բնական ճանապարհով էր հղիացել եռյակով (երեքն էլ տղաներ), տանը երեք տղաներին սպասում են երկու ավագ քույրերը ու մեկ եղբայր:

Շուշանիկի խոսքով ինքը հղիության միայն 12 շաբաթականում է իմացել, որ ոչ թե մեկ, այլ միանգամից երեք երեխա է ունենալու: Եվ շատ զարմացել է, քանի որ ո՛չ իր, ո՛չ ամուսնու ցեղում բազմապտուղ հղիություն չի եղել:

Եռյակը ծնվել է հղիության 28 շաբաթականում, տղաները համարվում են խորը թերհաս, նրանց քաշը 500-900 գրամ է: Հիմա նրանք գտնվում են ինտենսիվ թերապիայի բաժանմունքում, ու մասնագետները անում են հնարավոր ամեն ինչ, որպեսզի օգնեն նրանց ողջ մնալ ու գնալ տուն՝ իրենց ավագ քույրերի ու եղբոր մոտ:

Ռազմիկ Աբրահամյանը նշեց, որ այդ ծննդատանը երկվորյակներ շատ են ծնվել, եռյակներ՝ նույնպես: Բայց քառյակը արտառոց երեւույթ է: Ավելին՝ բնական ճանապարհով՝ առանց ժամանակակից վերարտադրողական տեխնոլոգիաներրի գործածման սաղմնավորված եռյակները ու քառյակները ինքնին հազվադեպ երեւույթ են՝ ոչ միայն Հայաստանում, այլեւ ամբողջ աշխարհում ( 2000 –ի տվյալներով աշխարհում ընդամենը 15 զույգ իդենտիկ քառյակ կար ): Մասնագետը նաեւ հիշեց, որ շատ տարիներ առաջ այդ ծննդատանը հնգյակ էր ծնվել, որոնցից չորսը ողջ էին մնացել:

Հետևեք NEWS.am Medicine-ին Facebook-ում և Twitter-ում