10 տարի սպասելուց հետո երիտասարդը հեռացրել է դեմքի հսկայական ուռուցքը

22-ամյա Լուկաս Մաքքալին ստիպված է եղել 10 տարի սպասել այս վիրահատությանը։ Նրա դեմքին հսկայական ուռուցք էր աճում, որը թեպետ բարորակ էր, սակայն մեծապես վատացնում էր նրա կյանք որակը։ 10 տարի նա գումար էր հավաքում վիրահատության համար։

Երիտասարդի մոտ բնածին լիմֆանգիոմա է ախտորոշվել։ Այդ ուռուցքը Նյու Յորքի վիրաբույժները հեռացրել են անցյալ երեքշաբթի։ Վիրահատության համար ավելի քան 112 000 դոլար է անհրաժեշտ եղել, եւ հիմա Լուկասի մայրը վստահեցնում է, որ տղայի մոտ ամեն բան նորմալ է։ Նա աստիճանաբար ապաքինվում է եւ  շնորհակալ է մարդկանց, որոնք նրան գումար են փոխանցել համացանցում քրաուդֆանդինգային հարթակի միջոցով։

Պլաստիկ վիրաբույժին երիտասարդը գտել էր հատուկ հաղորդման միջոցով, որը պատմում էր ծանր դեֆորմացիաներով հիվանդների մասին։ Նյու Յորքի բժիշկները, զննելով Լուկասին, գրեթե անմիջապես հանձն առան օգնել նրան եւ հայտարարեցին, որ գործի կդնեն բոլոր ուժերը։ Լուկասը սոցցանցում խոստովանել է, որ ինքը կյանքի 10 տարիների ընթացքում 24 վիրահատություն է տարել ուռուցքը բուժելու համար։ 25-րդը պետք է լիներ ամենամեծը, եւ հենց այդ վիրահատությունը պետք է փոխեր նրա դեմքը՝ վերադարձնելով նորմալ արտաքինը։

Լուկասի մայրը պատմել է, որ տղայի երազանքներն իրականացել են։ Վիրահատության արդյունքներն անգամ ավելի լավն էին, քան իրենք սպասում էին։ Լուկասի  հետվիրահատական լուսանկարները դեռ չկան, սակայն հասարակությունը հույս ունի դրանք տեսնել մոտ ապագայում։

Լիմֆանգիոման բնածին ուռուցք է, որը զարգանում է գլխի եւ պարանոցի վրա։ Երբեմն դրանք փակում են օդի ճանապարհը եւ քրոնիկ ցավեր առաջացնում։

Հետևեք NEWS.am Medicine-ին Facebook-ում և Twitter-ում