Այսօրվա դրությամբ Հայաստանի հիվանդանոցներում գրիպով եւ ՍՇՎ-ով մոտ 670 հիվանդ կա, եւ նրանցից մոտ 96 տոկոսը մինչեւ 4 տարեկան երեխաներն են: Այս մասին լրագրողներին հայտնեց Առողջապահության նախարարության գլխավոր վարակաբան Արա Ասոյանը:
Նրա խոսքով՝ մեծահասակները նույնպես բավականին հաճախ են գրիպով եւ շնչառական այլ ինֆեկցիաներով հիվանդանում, սակայն, որպես կանոն, տանն են բուժվում եւ բժշկի չեն դիմում: Իսկ եթե երեխան է հիվանդանում, նրան անմիջապես բժշկի մոտ են տանում՝ հաճախ նույնիսկ ոչ թե պոլիկլինիկա, այլ անմիջապես հիվանդանոց:
Բժիշկ Ասոյանը նաեւ նշեց, որ գրիպով եւ ՍՇՎ-ով հիվանդացությունը վերջին շաբաթներին աճել է, սակայն հարկ չկա խոսելու համաճարակի կամ նույնիսկ բռնկման մասին: Ավելին՝ անցած տարիներին հիվանդացությունը ավելի բարձր է եղել, քան այս տարի: Մասնագետի խոսքով՝ գրիպի եւ ՍՇՎ վիրուսների տարածմանը նպաստել է նաեւ այն, որ ամանորյա եւ ծննդյան տոների ժամանակ մարդիկ հաճախ են միմյանց հյուր գնացել, նույնիսկ եթե հիվանդ են եղել:
Մասնագետը հայտնեց, որ հիմա Հայաստանում տարածված են А եւ В տեսակի գրիպի վիրուսները:
Հետաքրքիր է, որ հաջող պատվաստման շնորհիվ, մասնագետի խոսքով, գործնականում գրիպի դեպքեր չկան ո՛չ զինվորների շրջանում (անցյալ տարեվերջին բոլոր նորակոչիկներին պատվաստել են գրիպի դեմ), ո՛չ բուժաշխատողների:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր