Բժիշկները որոշել են շրթունքների իդեալական ձեւը (ֆոտո)

Գիտնականները հարցում են անցկացրել աշխարհի 35 տարբեր երկրներից 1000 մարդու շրջանում, որի ընթացքում պարզել են, որ առավել գայթակղիչ են համարվում համաչափ ուռուցիկ շրթունքները, հայտնում է Independent-ը:

Հետազոտության ընթացքում, որի արդյունքները հրապարակվել են Journal of Cranio-Maxillofacial Surgery գիտական ամսագրում, հարցվածների 60 տոկոսը վերին եւ ստորին շրթունքների միջեւ 1:1 հարաբերակցությունը համարել են առավել գրավիչ ձեւ: Այլ խոսքով՝ ամենասեքսուալ է ճանաչվել այն ձեւը, որի դեպքում վերին եւ ստորին շրթունքները չափով միատեսակ են:

Հետազոտության հեղինակ, բժիշկ Փոլ Հայդեքրյուգերը նշում է, որ շրթունքների այսպիսի ձեւ ունի հոլիվուդյան դերասանուհի Սքարլեթ Յոհանսոնը: Նա ընդունել է, որ իրենց հետազոտության արդյունքների համաձայն՝ Յոհանսոնի շրթունքները համարվում են շրթունքների ամենասեքսուալ ձեւի կատարյալ օրինակ:

Երկրորդ հորիզոնականում է մի փոքր ուռուցիկ ստորին շրթունքի ձեւը, ինչպիսին աստղ եւ բիզնեսվումեն Քայլի Ջենների մոտ է, ում հաջողվել է իր շրթներկերի հավաքածուի շնորհիվ մի ամբողջ կայսրություն ստեղծել:

Ի դեպ, մեկ այլ հետազոտության համաձայն, որն ավելի վաղ անցկացրել է բրիտանացի պլաստիկ վիրաբույժ Ջուլիան Դե Սիլվան, ամենասեքսուալ շրթունքներն ունի ամենեւին էլ ոչ Ջենները եւ նույնիսկ ոչ Յոհանսոնը, այլ քանթրի երգչուհի Թեյլոր Սվիֆթը:

Նրա շրթունքները համաչափ են, նաեւ վերեւի շրթունքի միջնամասում վառ արտահայտված փոսիկ կա՝ այսպես կոչված Կուպիդոնի աղեղ: Դե Սիլվայի կարծիքով՝ շրթունքների հենց այս առանձնահատկությունն է տղամարդկանց առավել գրավիչ թվում:

«Թեյլորի շրթունքները հիասքանչ են: Նա բերանի հրաշալի ձեւ ունի եւ ընդգծված «Կուպիդոնի աղեղ»՝ շրթունքների ձեւի յուրահատկություն, որով երազում են օժտված լինել իմ բոլոր հաճախորդները: Ռիհաննայի շրթունքները եւս մեծ հանրաճանաչություն են վայելում եւ նրա մոտ նույնպես, ինչպես Թեյլորի մոտ, «Կուպիդոնի աղեղը» ընդգծված է»,- նշում է մասնագետը:

Դե Սիլվայի խոսքով՝ շրթունքները սկսում են բնականորեն փոքրանալ 28 տարեկանից սկսած: Սա կապված է կոլագենի եւ գիալուրաթթվի արտադրման դանդաղմամբ: Նա նշել է, որ հենց այս տարիքում են կանայք սկսում մտածել շրթունքների ձեւի շտկման եւ դրանք մեծացնելու մասին:

Ջուլիան Դե Սիլվան մարտին որոշել է, որ Մեգան Մարքլը թագավորական ընտանիքում ամենագրավիչ կինն է: Նա 36-ամյա Մարքլի, Քեմբրիջի դքսուհու, Զառա Ֆիլիփսի, արքայադուստր Բեաթրիսի եւ արքայադուստր Եվգենյայի դեմքի կառուցվածքը վերլուծել է «ոսկե հատման» սկզբունքներով: Արքայազն Հարրիի հարսնացուի համամասնությունները ստացել են 87,4 տոկոս: Երկրորդ տեղը զբաղեցրել է Քեյթ Միդլթոնը՝ ստանալով 86,8 տոկոս: Երրորդ տեղում է Զառա Ֆիլիփսը՝ 81,6 տոկոս:

Հետևեք NEWS.am Medicine-ին Facebook-ում և Twitter-ում