Կինն աուտիկ երեխայի հետ փողոցում է հայտնվել. Անահիտ Բախշյանը Նիկոլ Փաշինյանի կնոջ օգնությանն է ապավինում

«Ելք» խմբակցությունից Երեւանի  ավագանու խորհրդի անդամ Անահիտ Բախշյանը փորձում է օգնել աուտիկ երեխա ունեցող կնոջը, ով գրեթե առանց  ապրուստի միջոցների հայտնվել է փողոցում:

NEWS.am Medicine-ի թղթակցի հետ զրույցում Բախշյանը պատմել է, որ Ալեքսանդրիայի պատմության մասին իմացել է Արգավանդում գտնվող եկեղեցու հոգեւորականից: Ինչպես հետագայում պարզվել է, Բախշյանն այդ ընտանիքի հետ դեռ մի քանի տարի առաջ է ծանոթացել՝ աուտիկ երեխայի երգեցողական տաղանդի շնորհիվ:

Այժմ Ալեքսանդրիան բարդ իրավիճակում է հայտնվել. ընկերուհին, ում տանը նա ապրում էր, վաճառել է բնակարանը եւ կինը զրկվել է բնակության վայրից:

«Ես սկսեցի հարցուփորձ անել եւ իմացա Պտղնի գյուղում տեղակայված հայ-ամերիկյան «Լայթ հաուզ» կազմակերպության մասին: Նրանք օգնում են փոքր երեխաներ ունեցող կանանց, բայց Ալեքսանդրիայի համար բացառություն են արել: Նա այնտեղ մոտ 2 շաբաթ է անցկացրել եւ ավելի երկար ժամանակով նրան չեն կարող թույլ տալ բնակվել», - պատմել է Բախշյանը:

Այժմ Ավագանու խորհրդի անդամը փորձում է լուծել կնոջ բնակության հարցը: Նրա կարծիքով հարցը կարելի է լուծել հանրակացարանում սենյակ տրամադրելով:

«Նոր Նորք համայնքում գտնվող հանրակացարանները գտնվում են Պետական գույքի կառավարման կոմիտեի բալանսում: Ես բազմիցս դիմել եմ կոմիտեին, բայց այդպես էլ պատասխան չեմ ստացել», - նշել է Բախշյանը:

Ըստ հոգեբանների, իրավիճակը բարդացնում է այն, որ երեխան առանց մոր մի րոպե անգամ չի կարող մնալ: Սա բավականին դժվարացնում է հարցի լուծումը, քանի որ դրա պատճառով Ալեքսանդրիան չի կարող աշխատանք գտնել:

 «Իմ հույսը Նիկոլ Փաշինյանի կնոջ՝ Աննա Հակոբյանի «Իմ քայլը» հիմնադրամն է: Այն, օրինակ կարող է վճարել Ալեքսանդրիայի բնակարանի վարձը: Հույս ունեմ, որ մենք կկարողանանք օգնել այդ կնոջը եւ նա այլեւս չի հայտնվի փողոցում», - նշել է Բախշյանը:

Հետևեք NEWS.am Medicine-ին Facebook-ում և Twitter-ում