Ալերգիկներից կեսի մոտ ոչ մի ալերգիա չկա. հետազոտություն

Իրենց ալեգիկ համարող մարդկանցից կեսի մոտ իրականում ոչ մի ալերգիա չկա: Այսպիսի անսպասելի եզրակացություն են կատարել Northwestern University-ի (ԱՄՆ) գիտնականները:

Գիտնականների խոսքով՝ մարդիկ հաճախ իրենց, այսպես կոչված, ալերգիան շփոթում են սննդային անհանդուրժողության կամ այլ վիճակի հետ:

ԱՄՆ-ում հետազոտություն է անցկացվել, որի ընթացքում հարցվածների 19 տոկոսն իրեն ալերգիկ է համարել: Սակայն բժիշկները «ալերգիա» ախտորոշումը հաստատել են 10 տոկոսից պակասի մետ: Այս տվյալները հրապարակվել են 40 հազար մարդու շրջանում ազգային հարցման արդյունքներն ամփոփելիս:

«Իրենց ալերգիկ համարողներից միայն կեսն է կարողացել ներկայացնել բժշկի նշանակած ադրենալինի դեղատոմսը (ԱՄՆ-ում ալերգիկներին խորհուրդ է տրվում անաֆիլակտիկ շոկը կանխելու համար): Մնացյալի մոտ ալերգիա չկար. նրանց մոտ առկա էր ընդամենը որոշակի մթերքի հանդեպ անհանդուրժողություն կամ ուղղակի հոգեբանական ռեակցիաներ»,- ասել են գիտնականները:

Իսկական ալերգիկների շրջանում առավել հաճախ ալերգիկ ռեակցիայի հարուցիչներ են եղել կակղամորթները, կաթը, գետնընկույզը եւ այլ ընկույզներ, ձուն, սոյան, ցորենը, ձուկը, քունջութը:

Փորձագետները նշել են, որ ալերգիկների մեծամասնությունը այս կամ այն մթերքի նկատմամբ ալերգիա ունենալու մասին տեղեկացել է արդեն հասուն տարիքում:

Հետևեք NEWS.am Medicine-ին Facebook-ում և Twitter-ում