Գիտնականները մարիխուանայի հետ կապված եւս մեկ վտանգ են հայտնաբերել

Երեխաները, որոնց մայրերը հղիության ընթացքում մարիխուանա են օգտագործել, ավելի թույլ իմունիտետ ունեն եւ սթրեսի նկատմամբ նրանց զգայունությունը բարձր է: Այս մասին զգուշացնում է Proceedings of the National Academy of Science ամսագրում հրապարակված հետազոտությունը։

Մաունթ Սինայ հիվանդանոցի «Իկան» բժշկական դպրոցի եւ Նյու Յորքի քաղաքային համալսարանի գիտնականները վերլուծել են ընկերքի գենային էքսպրեսիան 322 մայր-երեխա զույգերի համար: Գիտնականները նաեւ ուսումնասիրել են վեց տարեկանում երեխաների վարքագիծն ու ֆիզիոլոգիան։ Ստացված մազերի նմուշները նրանց թույլ են տվել չափել հորմոնալ մակարդակները, իսկ սթրեսային իրավիճակների ժամանակ սրտի զարկերի հաճախականությունը չափել են էլեկտրակարդիոգրամայի միջոցով: Երեխաների վարքագիծը գնահատել են ծնողների կողմից լրացված հարցաթերթիկների միջոցով:

Ինչպես պարզվել է, այն երեխաները, որոնց մայրերը հղիության ընթացքում մարիխուանա են օգտագործել, ավելի շատ տագնապայնություն են ապրել, ավելի ագրեսիվ եւ հիպերակտիվ են եղել: Մյուս երեխաների համեմատ՝ նրանց մոտ կորտիզոլ հորմոնի մակարդակն ավելի բարձր է եղել։ Նրանք նաեւ սրտի զարկերի միջեւ ավելի կարճ ընդմիջում են ունեցել, ինչը վկայում է սթրեսի նկատմամբ ավելի մեծ զգայունության մասին: Ծննդաբերության ժամանակ հավաքված ընդերքային հյուսվածքի ՌՆԹ-ի հաջորդականությունը ցույց է տվել, որ մայրերի կողմից մարիխուանայի օգտագործումը հանգեցրել է երեխաների մոտ իմունային համակարգի ակտիվացման հետ կապված գեների, մասնավորապես, պրոբորբոքային ցիտոկինների եւ I տիպի ինտերֆերոնների ավելի քիչ արտահայտման հետ:

Հետևեք NEWS.am Medicine-ին Facebook-ում և Twitter-ում