Նյու-Յորքում գործող Լանգոնի բժշկական կենտրոնում շաբաթը վեց անգամ՝ երկուշաբթի եւ ուրբաթ օրերին դոկտոր Սամիր Տանեջան շագանակագեղձի բիոպսիա է իրականացնում՝ քաղցկեղի ախտորոշմանը հաստատում գտնելու համար: Սակայն, ի տարբերություն պրոցեդուրայի իրականացման ավանդական մեթոդի, մասնագետն այն առավել ճշգրիտ թիրախավորման հնավարություն ընձեռող մագնիսառեզոնանսային պատկերմամբ է զուգորդում, հաղորդում է FoxNews-ը:
Դոկտոր Տանեջան, ի թիվս մի շարք այլ բժիշկների եւ գիտնականների, վաղուց է շագանակագեղձի քաղցկեղի հայտնաբերման եւ բուժման հարցում մագնիսառեզոնանսային հետազոտության արդյունավետությունն ուսումնասիրում: Մեթոդի կողմնակիցները նախ եւ առաջ դրա՝ քաղցկեղի ագրեսիվ ու վտանգավոր տեսակներն ընդհանրապես բուժման կարիք չունեցող դրսեւորումներից առանձնացնելու հատկությունն են մատնանշում:
Բացի այդ, մագնիսառեզոնանսային պատկերումը կարող է նաեւ բուժման որոշ եղանակների, մասնավորապես, շագանակագեղձում փոքր չափերի ուռուցքներ հայտնաբերելու դեպքում դրանց ոչնչացման նպատակով նշանակվող կիզակետային ճառագայթման արդյունավետության բարձրացմանը ծառայել: Վերը հիշատակված պրոցեդուրան գեղձի անձեռնմխելիությամբ է բնորոշվում. ի տարբերություն վիրաբուժական միջամտության կողմնակի ազդեցությունների, այն չի կարող սեռական դիսֆունկցիայի եւ անմիզապահության հանգեցնել:
Մինչ այժմ հավաքագրված տվյալների վերլուծությունն այն մասին է վկայում, որ, մագնիսառեզոնանսային պատկերմամբ իրականացման պարագայում, շագանակագեղձի բիոպսիան, ի տարբերություն պրոցեդուրայի ավանդական եղանակի, ագրեսիվ քաղցկեղով ախտահարման առավել մեծ թվով դեպքեր բացահայտելու եւ, ըստ էության, կյանք փրկելու հնարավորություն է ընձեռում: Դոկտոր Տանեջայի հավաստիացմամբ, պատկերման օբյեկտիվից միայն չափազանց փոքր չափեր ունեցող եւ աննշան սպառնալիք պարունակող ուռուցքները կարող են վրիպել:
Մասնագետը մտադիր է նորահայտ մեթոդը ուրոլոգիական օնկոլոգիայի ամերիկյան ընկերակցության՝ ընթացիկ տարվա դեկտեմբեր ամսին կայանալիք տարեկան ժողովի քննարկմանը ներկայացնել: Նպատակը մեկն է՝ մագնիսառեզոնանսային հետազոտությունը բուժման՝ նախքան բիոպսիայի իրականացումը գործարկման ենթակա ստանդարտ դարձնել:
Դոկտոր Տանեջայի հակառակորդները նշում են, որ թեմայի շուրջ հավելյալ հետազոտությունների կարիք է զգացվում՝ մագնիսառեզոնանսային հետազոտության հետ կապված հավելյալ ծախսերի արդարացման համար: Նշենք, որ մեկ հետազոտության արժեքը կարող է 600-2000 եւ ավելի ԱՄՆ դոլար կազմել, թեեւ Medicare-ը եւ մի շարք այլ՝ բժշկական ապահովագրությամբ զբաղվող ընկերություններ դրա վճարն էլ ամբողջությամբ կամ մասնակի փոխհատուցելու պատրաստակամություն են հայտնում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր