Տաք գուլպաներն ու տաք քիթը կարող են օգնել կանխել գրիպն ու մրսածությունը

Քարդիֆի համալսարանի մրսածության կենտրոնի տնօրեն Ռոն Էքլսը պնդում է, որ սառած ոտքերը կարող են նպաստել գրիպի եւ մրսածության առաջացմանը: Նա արդեն 25 տարի ուսումնասիրում է մրսածության խնդիրը եւ վերջերս այդ թեմայով գրականության դիտարկում  է կատարել:

Նրա խոսքով, շատ հիվանդությունների հարուցիչներն ի սկզբանե գտնվում են մեր քթի մեջ, բայց մեզ վնաս չեն հասցնում: Սակայն, եթե հանկարծ ոտքերը սառչում են, քթի ջերմությունը նույնպես ընկնում է, անոթները նեղանում են, եւ քթի արյան մատակարարումը՝ դանդաղում: Դրա պատճառով կրճատվում է վիրուսների դեմ պայքարող արյան սպիտակ բջիջների քանակը, եւ վիրուսներն ի վերջո ներթափանցում են օրգանիզմ՝ դառնալով գրիպի եւ մրսածության զարգացման պատճառ:

 «Եթե չեք ցանկանում հիվանդանալ, պետք է քիթը տաք պահել, տաք հագուստ կրել եւ ոտքերը չթացացնել»,-ասել է բժիշկ Էքլսը:

Ոչ շատ վաղուց ամերիկացի հետազոտողները պարզել են, որ մրսածության հարուցիչներն ավելի հեշտ են բազմանում 33◦C-ի (քթի ներսի ջերմաստիճանը) դեպքում, քան 37-ի (մարմնի խորը ներքին ջերմաստիճանը): Այսպիսով, իմունային համակարգը 33 աստիճանի դեպքում այնքան արդյունավետ չի գործում, որքան ավելի բարձր ջերմաստիճանի դեպքում:

Երբ ամբողջ մարմինը սառչում է, դա նույնպես իջեցնում է իմունիտետը: Բայց հետաքրքիր է, որ բերանի սառչելը (պաղպաղակից կամ սառն ըմպելիքներից) ոչ մի կերպ չի ազդում հիվանդանալու հավանականության վրա, ուստի բժիշկ Էքլսի խոսքով ձմռանը հանգիստ կարելի է պաղպաղակ ուտել, բայց քիթն ու ոտքերն անհրաժեշտ է տաք պահել:

Հետևեք NEWS.am Medicine-ին Facebook-ում և Twitter-ում