Արտամարմնային բեղմնավորում 3 ծնողից. ԱՄՆ քննարկում է այս պրոցեդուրան թույլատրելու հարցը

ԱՄՆ առողջապահության նախարարությունը քննարկում է մարդկանց վրա այն տեխնոլոգիայի փորձարկումը թույլատրելու հարցը, որը կարող է մարդկությանն ազատել ժառանգական հիվանդություններից: Խոսքն այնպիսի երեխաների ծնվելու մասին է, որոնք միաժամանակ 3 «ծնող» կունենան:

ԱՄՆ-ի սննդամթերքների եւ դեղամիջոցների որակի սանիտարական հսկողության վարչությունը (FDA) երկօրյա կոնֆերանս է անցկացրել՝ նվիրված արտամարմնային բեղմնավորման (ԱՄԲ)  նոր տեխնիկային, որը երեխաներին հնարավորություն կտա ծնվելու միանգամից երեք ծնողից՝ երկու մորից եւ մեկ հորից: Երեք տարբեր ԴՆԹ-ների համակցության շնորհիվ՝ բժիշկները կկարողանան ստեղծել ժառանգական հիվանդություններից, այդ թվում՝ կուրությունից եւ էպիլեպսիայից զերծ էմբրիոններ: Գիտնականները կանխատեսում են, որ ժամանակի ընթացքում կարող են առանց գենետիկական հիվանդությունների սերունդներ ծնվել:

«Թույլատրելով նման պրոցեդուրաները՝ մենք այդպիսով կստեղծենք գենետիկորեն մոդիֆիկացված երեխաներ»,- ասում է Բերքլիի (Քալիֆորնիա նահանգ) Գենետիկայի եւ հասարակության կենտրոնի գործադիր տնօրեն Մարսի Դարնովսկին, փոխանցում է Fox News-ը:

Տեխնոլոգիան ենթադրում է մայրական ձվաբջջում միտոքոնդրիումային ԴՆԹ-ի փոխարինում մեկ այլ կնոջ առողջ դոնորական ձվաբջջից առողջ միտոքոնդրիումներով մուտացիաներով: Հետո կատարվում է սովորական արտամարմնային բեղմնավորում, եւ էմբրիոնը հետ են փոխպատվաստում մորը: Մեթոդը մշակել է Օրեգոնի գիտության եւ առողջության համալսարանի գենետիկ Շուխրատ Միտալիպովը: Նա 90-ականներին առաջին անգամ հաջողությամբ պրիմատ է կլոնավորել: Այս պրոցեդուրայի միջոցով Միտալիպովն արդեն 5 առողջ կապիկ է ստեղծել, որոնք ի սկզբանե դատապարտված են եղել գենետիկական հիվանդությունների: Հիմա գիտնականը սպասում է մարդկանց վրա փորձարկումներ անելու թույլտվության:

Հետևեք NEWS.am Medicine-ին Facebook-ում և Twitter-ում