Իջեւանից 15 ամսական Կամոն արդեն մոտ 20 օր է` բուժվում է ընդերային լեյշմանիոզի դեմ` վտանգավոր վարակիչ հիվանդության, որը ուշ ախտորոշվելու եւ բուժումն ուշ սկսելու դեպքում կարող է մահվան հանգեցնել: Բարեբախտաբար, Կամոյի դեպքում հաջողվել է ժամանակին հայտնաբերել հիվանդությունը եւ սկսել բուժումը:
Վարսինեն` Կամոյի մայրը NEWS.am Medicine-ին պատմել է, թե որդին ինչպես է հիվանդացել է եւ ինչպես է ախտորոշվել հիվանդությունը:
Ամեն ինչ սկսվել է բարձր ջերմաստիճանից: Կամոյի ծնողները, որոնք մշտական կապ են պահպանում մանկաբույժի հետ, անմիջապես խորհրդակցեցին նրա հետ: Սկզբում կարծում էին, թե երեխան գրիպով է հիվանդացել, սակայն գրիպի եւ նույնիսկ մրսածության ուրիշ որեւէ ախտանիշ նա չուներ:
Բժիշկը ստուգեց երեխայի թոքերը. ամեն ինչ կարգին էր: Սակայն ջերմությունը պահպանվում էր. ստիպված էին լինում դեղերի եւ շփումների միջոցով իջեցնել:
Բժիշկը նաեւ առաջարկեց արյան անալիզ հանձնել, որը հեմոգլոբինի ցածր մակարդակ ցույց տվեց: Ճիշտ է, այդ ժամանակ լեյշմանիոզ չկասկածեցին: Չնայած լեյշմանիոզը շատ վտանգավոր հիվանդություն է, չգիտես ինչու, դրա մասին քչերը գիտեն: Կամոյի ծնողները եւս այդ ժամանակ դրա մասին ոչինչ չէին լսել:
8 օր շարունակ երեխայի մոտ պահպանվում էր բարձր ջերմաստիճանը, եւ ծնողները ստիպված էին նրան նորից տանել տեղի պոլիկլինիկա: Բարեբախտաբար, պոլիկլինիկայի տնօրենը վերջերս մասնակցել էր լեյշմանիոզի մասին սեմինարների. երեխայի մոտ այդ հիվանդությունը կասկածելով` նա վերջինիս անմիջապես ուղարկեց Երեւան` հետազոտման:
Անալիզները հաստատեցին. երեխան լեյշմանիոզ ուներ: Նրան նաեւ պունկցիա արեցին, որը ցույց տվեց, որ հարուցիչն արդեն առկա էր նաեւ ոսկրածուծում: Այդ ժամանակ «Նորք» վարակիչ հիվանդանոցում սկսեցին բուժումը:
Լեյշմանիոզի բուժման դեղամիջոցը բավականին թունավոր է եւ բազմաթիվ հակացուցումներ ունի: Բոլորովին էլ ոչ բոլոր երեխաներն են հեշտ տանում բուժումը: . Համոզվելու համար, որ Կամոյի մոտ ոչ մի բարդացում եւ բուժման կողմնակի հետեւանք ի հայտ չի գալիս, նրանից կանոնավոր կերպով արյան անալիզ են վերցնում, ինչպես նաեւ ժամանակ առ ժամանակ նրան հետազոտում է սրտաբանը:
Ինչպես նշել են Վարդենիսում, բուժումը սկսելուց արդեն մեկ շաբաթ անց երեխայի ջերմությունն իջավ ու դադարեց բարձրանալ, իսկ արյան ցուցանիշները սկսեցին նորմային համապատասխանել: Նրա արագ բուժմանը հավանաբար նպաստում է նաեւ այն փաստը, որ նրա մայրը, արհեստական սննդի հետ մեկտեղ, շարունակում է նրան կրծքի կաթով կերակրել, որը, ինչպես պնդում են շատ մասնագետներ, շատ օգտակար է երեխայի իմունիտետի համար:
«Վերջերս այդ հիվանդությունն ակտիվ է Հայաստանում, եւ շատ կարեւոր է, որ մարդիկ իմանան այդ մասին: Եթե ես նախկինում իմանայի այդ հիվանդության մասին, տղայիս հենց առաջին օրը, երբ նրա մոտ բարձրացել էր ջերմաստիճանը, համենայն դեպս կտանեի բժշկի եւ կխնդրեի ստուգել, թե արդյոք լեյշմանիոզով է վարակվել», - ասել է Վարսինեն:
Կամոն դեռեւս մի քանի օր պիտի լեյշմանիոզի դեմ դեղամիջոց ստանա, ինչից հետո նրան հավանաբար դուրս կգրեն հիվանդանոցից:
Հիշեցնենք, որ լեյշմանիոզը մարդուն փոխանցվում է միջատների խայթոցից, որոնք մինչ այդ հիվանդ կենդանիների են խայթել: Լեյշմանիոզի հարուցիչի` Leishmania պարզագույն մակաբույծի բնական պահեստարան են համարվում կենդանիները, այդ թվում նաեւ` շունը: Ճիշտ է, առանց մոծակի մասնակցության, հիվանդ կենդանուց անհնար է վարակվել:
Ինքը` Կամոն, ամենայն հավանականությամբ, վարակվել է դեռեւս ամռանը, երբ մոծակները հատկապես ակտիվ են, սակայն քանի որ հիվանդությունը կարող է բավականին երկար` մինչեւ մի քանի ամիս տեւող ինկուբացիոն շրջան ունենալ, այն երկար ժամանակ չէր դրսեւորվում:
Ինչպես նշել է բժիշկ վարակաբան Հռիփսիմե Ապրեսյանը, վերջին տարիներին Հայաստանում լեյշմանիոզի ավելի քան 200 դեպք է գրանցվել, ամեն տարի դեպքերի թիվն աճում է: Մասնագետի խոսքով, ընդերային լեյշմանիոզով տարեկան միջինը 20-30 հիվանդ է հանդիպում:
ԱՀԿ-ի տվյալներով, ամեն տարի աշխարհում լեյշմանիոզով վարակման մոտ 1,3 մլն նոր դեպք է գրանցվում եւ մահվան 20 000 - 30 000 դեպք:
Քանի որ ընդերային լեյշմանիոզը (հիվանդության հենց այդ տեսակն է տարածված Հայաստանում) առանց համապատասխան բուժման կարող է սպանել հիվանդին եւ քանի որ դրանով հիմնականում մինչեւ 5 տարեկան երեխաներ են վարակվում, մասնագետները ծնողներին եւ առաջին բուժական օղակի աշխատակիցներին կոչ են անում ուշադիր լինել ու նվազագույն կասկածի դեպքում հիվանդացած երեխաների մոտ ստուգել լեյշմանիոզի առկայությունը: Որքան ավելի շուտ արվի ախտորոշումը, այնքան շատ երեխա առողջանալու շանս կունենա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր