Կրծքի իմպլանտների պատճառով քաղցկեղի վտանգը 10 անգամ ավելի մեծ է, քան համարվում էր. գիտնականներ

Կաթնագեղձի քաղցկեղի առաջացման վտանգը կրծքի իմպլանտների տեղադրումից հետո իրականում 10 անգամ ավելի մեծ է, քան ընդունված էր համարել: Այսպիսի պնդմամբ է հանդես եկել ԱՄՆ առաջատար պլաստիկ վիրաբույժներից մեկը՝ Մարկ Քլեմենսը:

Այսօր ամբողջ աշխարհում աճում է կրծքի քաղցկեղի բավական յուրահատուկ տարատեսակով հիվանդացությունը, որը կապված է կրծքի իմպլանտների հետ եւ կոչվում է անապլաստիկ խոշորբջջային լիմֆոմա կամ BIA-ALCL: Եվ չնայած հիվանդների թիվը համեմատաբար փոքր է, մասնագետները այս հիվանդության վտանգավորության աստիճանը չեն թերագնահատում, պնդում է պրոֆեսոր Քլեմենսը:

Նա կրծքի քաղցկեղի այս տարատեսակով հիվանդների թվին հետեւում է 2011 թվականին գրանցված ամենաառաջին դեպքից հետո: Մասնագետի կարծիքով՝ կանանց համար այս հիվադությանը բախվելու հավանականությունը 10 անգամ ավելի մեծ է կրծքի իմպլանտներ տեղադրելուց հետո: Ներկայումս BIA-ALCL է ախտորոշվել աշխարհի տարբեր երկրներից 173 հիվանդի մոտ:

Որոշ մասնագետներ համաձայն են Քլեմենսի հետ եւ պնդում են, որ տվյալ վիճակագրությունը իրականում միայն «այսբերգի գագաթն» է, այս հիվանդությամբ ախտահարվածների թիվն իրականում ավելի շատ է:

Մասնագետների խոսքով՝ հիվանդությունը զարգանում է  առավել տարածված իմպլանտների պատճառով, որոնք օգտագործվում են կուրծքը մեծացնելու համար: Ըստ որում՝ կանանց մեծ մասը, որոնք մտնում են ռիսկի խմբի մեջ,  այդ մասին նույնիսկ չեն կասկածում: Հետազոտությունները, որոնք անցկացվել են Ֆրանսիական բժշկական կարգավորող գերատեսչության՝ Agence Nationale de Sécurité du Médicament et des Produits de Santé-ի (ANSM) փորձագետների կողմից, ցույց են տվել, որ միանշանակ կապ կա իմպլանտների եւ BIA-ALCL-ի զարգացման միջեւ:

Տեսականորեն բոլոր կանանց, որոնք կրծքի մեծացում են կատարում, բժիշկները դեռ 2011 թվականից պետք է զգուշացնեին BIA-ALCL-ի զարգացման վտանգի մասին: Այդպիսի որոշում է ընդունվել ԱՄՆ-ում եւ շատ այլ երկրներում, իսկ Առողջապահության համաշխարհային կազմակերպությունը բժիշկներից պահանջում է շտապ հաղորդել այս հիվանդության ցանկացած դեպքի մասին: Ցավոք, պրակտիկան ցույց է տալիս, որ շատ հիվանդներ այդպիսի նախազգուշացում ժամանակին չեն ստանում:

Հետևեք NEWS.am Medicine-ին Facebook-ում և Twitter-ում