Նոր հաշվողական մոդելը կարող է գնահատել կրծքագեղձի քաղցկեղի ռիսկը. AB

Մադրիդի Կառլոս III համալսարանի (Իսպանիա) և Ջոն Հոփկինսի համալսարանի (ԱՄՆ) գիտնականները մշակել են նոր հաշվողական մոդել, որը կարող է գնահատել կրծքագեղձի քաղցկեղի ուռուցքների վտանգը՝ ելնելով դրանց մեխանիկական և հյուսվածքային հատկություններից: Հետազոտությունը հրապարակվել է Acta Biomaterialia (AB) ամսագրում:

Նշվում է, որ հաշվողական մոդելը կանխատեսում է ուռուցքի աճի հավանականությունը՝ վերլուծելով դրանց հատկությունները՝ կոշտությունը, խտությունը և հատուկ միկրոմիջավայրը։ Ուռուցքային միկրոմիջավայրը ուռուցքը շրջապատող հստակ էկոհամակարգն է, որը սովորաբար բաղկացած է ոչ ուռուցքային բջիջներից և դրանց արտադրած մոլեկուլներից:

Գիտնականները բացատրել են, որ ուռուցքի աճի գործընթացը ներառում է դրա տարածումը շրջակա հյուսվածքի միջոցով, որը սովորաբար կազմված է ֆիբրիլյար մատրիցից (օրինակ՝ կոլագենից): Ուռուցքի չափը կախված է բազմաթիվ գործոններից, ինչպիսիք են ուռուցքային բջիջների ընդհանուր թիվը, դրանց ծավալը, կարծրությունը և սննդանյութերի հասանելիությունը:

Հաշվողական մոդելին կանխատեսման համար տվյալներ տրամադրելու համար գիտնականները մի շարք լրացուցիչ ուսումնասիրություններ են անցկացրել՝ օգտագործելով բջջային մոդելավորում: Սա թույլ տվեց գիտնականներին հասկանալ, թե ինչպես է ուռուցքի հյուսվածքն ազդում քաղցկեղի բջիջների բազմացման (բազմապատկման) և միգրացիայի վրա:

Հետազոտողները նշել են, որ դրանց զարգացումը կարող է դառնալ կրծքագեղձի քաղցկեղի համապարփակ ախտորոշման մի մասը և նպաստել արդյունավետ բուժման արագացված ընտրությանը:

Հետևեք NEWS.am Medicine-ին Facebook-ում և Twitter-ում