Աղջիկները ամեն ամիս պետք է տեսնեն դաշտանային ցիկլ, և եթե ունենում են ուշացումներ, 2-3 ամիս դաշտանի բացակայություն, դա արդեն կարող է վկայել պոլիկիստոզ ձվարանային համախտանիշի մասին, որը հետագայում կարող է դառնալ անպտղության պատճառ: Այս մասին, այսօր՝ ապրիլի 2-ին, NEWS.am Medicine-ի հետ զրույցում ասաց Պտղաբերության կենտրոնի ռեպրոդուկտոլոգ Դիաննա Մարտիրոսյանը:
Դաշտանային ցիկլի ուշացումները՝ հնարավոր անպտղության առաջին ախտանիշներ
Բժշկի խոսքով, վերարտադրողական առողջության խնդիրները հավասարապես դիտվում են թե՛ կանանց, թե՛ տղամարդկանց մոտ: Աղջիկների մոտ դեռահասության շրջանում կարող են առաջանալ հորմոնալ խանգարումներ, ինչի արդյունքում խախտվում է դաշտանային ցիկլը: Այդ տարիքում շատ կարևոր է հետևել դաշտանային ցիկլի կանոնավորությանը, ավելորդ քաշի առկայությանը, մազակալմանը: Նման դեպքերում հարկավոր է դիմել բժշկին, անցնել հորմոնալ և ուլտրաձայնային հետազոտություններ և բժշկի ցուցումով համապատասխան հորմոնալ թերապիա անցնել:
Վնասակար սովորությունների ազդեցությունը վերարտադրողական առողջության վրա
Խոսելով դեռահասության շրջանում ձևավորվող վնասակար սովորությունների՝ վերարտադրողական առողջության վրա ունեցած ազդեցության մասին, Դիաննա Մարտիրոսյանը նշեց, որ դրանք ազդում են ընդհանուր օրգանիզմի վրա:
«Վնասակար սովորությունները՝ ծխելը, ալկոհոլի չարաշահումը միշտ կարող են վատ անդրադառնալ սերմի ցուցանիշների վրա: Հատկապես ծխելը շատ վատ է անդրադառնում սպերմոգրամայի ցուցանիշների վրա, անգամ ամենալավ սերմի պարագայում տղամարդը կարող է կորցնել բեղմնավորելու ունակությունը»,-պարզաբանեց ռեպրոդուկտոլոգը :
Խորհուրդներ աղջիկներին և տղաներին
Բժշկի խոսքով, տղաները կարող են ոչ մի ախտանիշ չունենալ, նորմալ սեռական հարաբերություն ունենալ, նորմալ սերմնաժայտքում ունենալ, բայց հետագայում ունենալ սերմի լուրջ խնդիրներ:
«Տղաները կարող են սերմի քննություն հանձնել, և եթե կան խնդիրներ, բուժեն, բուժման արդյունքում լավ սերմը սառեցնեն, որ հետագայում եթե սերմի հետ խնդիրներ առաջանան, իմանան, որ ունենան սառեցված սերմ»,- խորհուրդ տվեց Դիաննա Մարտիրոսյանը:
Իսկ կանանց, անգամ նրանց, ովքեր ամուսնացած չեն, բժիշկը խորհուրդ է տալիս անցնել ուլտրաձայնային հետազոտություն, հորմոնալ մինիմալ հետազոտություններ՝ իրենց ռեպրոդուկտիվ առողջությունը գնահատելու համար:
«35 տարեկանից հետո կնոջ ձվարանային պաշարը շատ կտրուկ է նվազում և եթե ունեն ցածր ձվարանային պաշար, ցանկալի է, որ այդ աղջիկները կատարեն ձվաբջիջների սառեցում, որպեսզի հետագայում կարողանան իրենց սեփական ձվաբջիջներով երեխա ունենալ»,-պարզաբանեց նա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր